پاکستان سنی تحریک کے وفد کی داتا گنج بخش علی ہجویریؒ کے دربار پر حاضری

وفد نے انتظامیہ سے زائرین کو فراہم سہولیات، سکیورٹی اور دیگر انتظامی معاملات پر تبادلہ خیال کیا

جمعرات 19 جون 2025 16:32

پاکستان سنی تحریک کے وفد کی داتا گنج بخش علی ہجویریؒ کے دربار پر حاضری

لاہور (اُردو پوائنٹ اخبارتازہ ترین - این این آئی۔ 19 جون2025ء) پاکستان سنی تحریک کے ایک اہم وفد نے گزشتہ روز برصغیر کے عظیم روحانی مرکز حضرت داتا گنج بخش علی ہجویری کے دربار پر حاضری دی، وفد میں ممتاز مذہبی شخصیت علامہ صاحبزادہ نعمان شاکر،محمد علی قادری ضلعی صدر پاکستان سنی تحریک فیصل آباد، محمد سلیم قادری (جوائنٹ سیکرٹری ضلع لاہور)، محمد شہزاد قادری اور دیگر ارکان شامل تھے۔

داتا دربار آمد پر وفد کا پرتپاک استقبال چیئرمین محمد ابریز میاں گڈونے کیا۔ اس موقع پر وفد کو پھولوں کے ہار پہنائے گئے اور دربار شریف کی چادر پیش کی گئی جسے وفد نے باادب انداز میں حضرت داتا گنج بخش کے مزار اقدس پر چڑھایا۔بعد ازاں وفد نے دربار ایڈمنسٹریٹر آفس کا بھی دورہ کیا جہاں مختلف شعبہ جات کا معائنہ کیا گیا اور دربار کی انتظامیہ سے ملاقات میں زائرین کو فراہم کی جانے والی سہولیات، صفائی، سکیورٹی اور دیگر انتظامی معاملات پر تبادلہ خیال کیا گیا۔

(جاری ہے)

اس موقع پر علامہ نعمان شاکر نے گفتگو کرتے ہوئے کہا کہ حضرت داتا گنج بخش کی تعلیمات صدیوں سے امت مسلمہ کے دلوں کو جوڑتی آئی ہیں۔ انہوں نے کہا کہ ایسی شخصیات کا فیض آج بھی زندہ ہے اور روحانی سکون کا بڑا ذریعہ ہے۔ انہوں نے دربار شریف کی انتظامیہ کی خدمات کو سراہا اور اس عزم کا اظہار کیا کہ پاکستان سنی تحریک ہمیشہ اولیائے کرام کے فیوض و برکات کو عام کرنے اور نوجوان نسل کو ان کی تعلیمات سے روشناس کرانے میں اپنا کردار ادا کرتی رہے گی۔دورے کے اختتام پر وفد نے ملکی سلامتی، استحکام، امت مسلمہ کے اتحاد اور فلسطین و کشمیر کے مظلوم مسلمانوں کے لیے خصوصی دعا بھی کی۔