Live Updates

پنشن پر ٹیکس لگانے کی منظوری دے دی گئی

سینیٹ کی قائمہ کمیٹی برائے خزانہ نے سالانہ ایک کروڑ روپے سے زیادہ پینشن پر ٹیکس کی تجویز منظور کرلی

محمد علی جمعرات 19 جون 2025 18:38

اسلام آباد (اُردو پوائنٹ اخبارتازہ ترین۔ 19 جون2025ء) پنشن پر ٹیکس لگانے کی منظوری دے دی گئی۔ تفصیلات کے مطابق وفاقی حکومت کی جانب سے حال ہی میں پیش کیے گئے آئندہ مالی سال کے بجٹ میں پنشنرز پر ٹیکس لگانے کی تجویز کو منظور کر لیا گیا ہے۔ اس حوالے سے جمعرات کے روز ہونے والے سینیٹ کی قائمہ کمیٹی برائے خزانہ کے اجلاس میں اہم پیش رفت ہوئی ۔ قائمہ کمیٹی خزانہ کا سینیٹر سلیم مانڈوی والا کی زیر صدارت اجلاس ہوا۔

سینیٹ کی قائمہ کمیٹی برائے خزانہ نے سالانہ ایک کروڑ روپے سے زیادہ پینشن پر ٹیکس کی تجویز منظور کرلی۔ اس کے علاوہ قائمہ کمیٹی نے بین الاقوامی کھلاڑیوں کو انکم ٹیکس چھوٹ دینے کی تجویز منظور کر لی۔ اجلاس کے دوران اقتصادی زونز اور اسپیشل ٹیکنالوجی زونز کو ٹیکس چھوٹ دینے کی تجویز بھی منظور کر لی گئی۔

(جاری ہے)

اس موقع پر سینیٹر انوشہ رحمٰن نے بتایا کہ حکومت نے خصوصی ٹیکنالوجی سے ٹیکس چھوٹ واپس لے لی ہے۔

جبکہ چیئرمین ایف بی آر نے کہا کہ جہاں جہاں ٹیکس چھوٹ ہے اسے ختم کر رہے ہیں۔ واضح رہے کہ وفاقی حکومت نے آئندہ مالی سال کے دوران پنشنرز کی پنشن میں صرف 7 فیصد اضافہ کیا ہے۔ اس کے علاوہ بیوہ خاتون کی پنشن بھی صرف 10 سال کیلئے محدود کر دی گئی ہے۔ جبکہ حال ہی میں اپنے ایک بیان میں وزیر خزانہ نے بھی پنشنرز پر ٹیکس لگانے کا عندیہ دیا تھا۔ وزیر خزانہ نے کہا پینشن کا حجم ترقیاتی بجٹ سے زیادہ ہے، ہمیں دیگرشعبوں کیلئے وسائل کی فراہمی کو یقینی بنانا ہے۔

سرکاری اخراجات میں کمی اورقرضوں کے منظم انتظام وانصرام کئے بھی اقدامات کئے جارہے ہیں، پنشن سمیت دیگرشعبوں میں اصلاحات کاعمل جاری ہے اورہمیں اسے آگے بڑھانا ہے۔ بجٹ میں پنشن کیلئے فنڈز کا حجم ایک ٹریلین روپے سے تجاوزکرگیا ہے جو ترقیاتی بجٹ سے زیادہ ہے، ہمیں دیگرشعبوں کیلئے وسائل کی فراہمی کو یقینی بنانا ہے، بجٹ میں 10ملین روپے سے زیادہ پینشن پر 5 فیصد ٹیکس کی تجویزدی گئی ہے۔ انہوں نے کہاکہ پبلک پرائیوٹ پارٹنرشپ اورپنشن کنٹری بیوشن کے حوالہ سے بالترتیب سندھ اورخیبرپختونخوا کے تجربات سے فائدہ اٹھانا چاہئے۔