پاکستان اسلامی دنیا کی بڑی موثر اور طاقتور دفاعی جوہری قوت ہے، مولانا فضل الرحمان

اسلام آباد (اُردو پوائنٹ اخبارتازہ ترین - اے پی پی۔ 19 جون2025ء) جمعیت علمائے اسلام (ف) کے سربراہ اوررکن قومی اسمبلی مولانا فضل الرحمان نے کہاہے کہ پاکستان اسلامی دنیا کی بڑی موثر اور طاقتور دفاعی جوہری قوت ہے۔ جمعرات کوقومی اسمبلی کے اجلاس میں بجٹ پربحث میں حصہ لیتے ہوئے مولانا فضل الرحمان نے کہاکہ ایوان میں ملک،داخلی وخارجہ تعلقات پربحث ہوتی ہے،اپوزیشن اصلاحات کی طرف حکومت کی توجہ مبذول کراتی ہے۔

مولانا فضل الرحمان نے کہاکہ ہندوستان پاکستان سے بڑاملک ہے مگرپاکستان نے جس جرات سے ملک کادفاع کیا،جس طرح بھارت کے دفاعی نظام کوناکام بنایا وہ قابل تعریف ہے۔ پاکستان نے بھارت کے غرورکوزمین بوس کردیا ہے اور ہرطرف سے پاکستان کی دفاعی قوت کی تحسین ہوئی۔

(جاری ہے)

انہوں نے کہاکہ ہماری قوم نے بہت قربانیاں دی ہیں، ہمیں فوج کے قربانیوں کاعتراف ہے ۔

انہوں نےکہاکہ کراچی میں عید کے دن دو دوسالہ بچے اغواء کئے گئے، یہ کونسی انسانیت ہے۔ انہوں نے کہاکہ ہم اپنا فکری عقیدہ اور ایمان سرینڈر نہیں کر سکتے، کوئی احساس ذمہ داری ہونا چاہئے کہ ہم کدھرجارہے ہیں۔ انہوں نے کہاکہ 60 ہزار فلسطینی شہیدہوچکے ہیں مگرصیہونی درندوں کی پیاس نہیں بھج رہی، جہاں پرمودی یاصیہونی مرتا ہے توبڑی طاقتیں بیچ میں آجاتی ہیں مگردوسری طرف پوراشہرملبے کاڈھیربن رہاہے، یہ انسانیت نہیں بلکہ حیوانیت ہے۔

انہوں نے کہا کہ پاکستان اسلامی دنیاکی بڑی موثر اور طاقتور دفاعی جوہری قوت ہے، پاکستان امت مسلمہ کی قیادت کااہل ہے ۔انہوں نے کہاکہ حالیہ پاک بھارت جنگ میں پاکستان متحدتھا جبکہ بھارت مین اپوزیشن اوراقلیتیں مودی کے ساتھ نہیں تھیں ،بھارتی جارحیت کے خلاف کامیابی کے بعد ہمیں خطہ میں مفادحاصل کرنے کیلے حکمت عملی بنانا ہوگی، پاکستان کوکھل کرایران ، فلسطینیوں اوراہل غزہ کے ساتھ کھڑاہونا چاہئے، یہود اور ہنود ایک دوسرے کے اتحادی ہیں، اسرائیل لبنان اورشام پرحملے کرچکاہے، عراق پرجوگزری ہے وہ سب کے سامنے ہیں، ہمیں خطہ کے ممالک اوردوست ممالک کوانگیج کرنا ہوگا، دوست ممالک کے ساتھ تعلقات میں گرمجوشی واپس لانے کیلئے ہمیں اپنی پالیسیوں پر ازسر نو غورکرنا ہوگا۔

انہوں نے کہاکہ روایتی سیاست کادورختم ہوچکاہے، عوام کو بیدار کرنا ہو گا تاکہ اپنے حق کیلئے آواز اٹھا سکے۔