ویسٹ انڈیز کیخلاف سیریز میں آسٹریلیا کے دو اہم بلے باز ٹیم سے باہر

دونوں کھلاڑیوں کی جگہ سیم کونسٹاس اور جوش انگلس کو ٹیم کا حصہ بنایا گیا ہے

ہفتہ 21 جون 2025 16:50

ویسٹ انڈیز کیخلاف سیریز میں آسٹریلیا کے دو اہم بلے باز ٹیم سے باہر

بارباڈوس(اُردو پوائنٹ اخبارتازہ ترین - این این آئی۔ 21 جون2025ء)آسٹریلوی بلے باز مارنس لبوشین کو ویسٹ انڈیز کے خلاف پہلے ٹیسٹ سے ڈراپ کر دیا گیا جبکہ اسٹیون اسمتھ انجری کے باعث ٹیم کا حصہ نہیں ہوں گے۔میڈیا رپورٹ کے مطابق دونوں کھلاڑیوں کی جگہ سیم کونسٹاس اور جوش انگلس کو ٹیم کا حصہ بنایا گیا ہے۔

(جاری ہے)

25 جون کو بارباڈوس میں شروع ہونے والے ٹیسٹ سے پانچ روز قبل آسٹریلیا کی جانب سے ان تبدیلیوں کی تصدیق سے معلوم ہوتا ہے کہ کینگروز جنوبی افریقا کے خلاف ورلڈ ٹیسٹ چیمپئن شپ میں کھلائی جانے والی بیٹنگ لائن سے کافی مختلف بیٹنگ کے ساتھ اتریں گے۔

سیم کونسٹاس بھارت کے خلاف سیریز میں آخری دو ٹیسٹ میچز کے بعد تیسری بار ایکشن میں دِکھائی دیں گے۔ انہوں نے میلبرن میں ڈیبیو کرتے ہوئے 65 گیندوں پر 60 رنز کی شاندار اننگز کھیلی تھی۔ جبکہ جوش انگلس نے رواں برس کے شروع میں سری لنکا کے خلاف گال میں ڈیبیو پر سینچری جڑی تھی۔واضح رہے ورلڈ ٹیسٹ چیمپئن شپ کے فائنل میں مارنس لبوشین کو بطور اوپنر کھلایا گیا تھا۔ انہوں نے دونوں اننگز میں 17 اور 22 رنز کی باریاں کھیل کر دو سال پر محیط خراب پرفارمنس کا تسلسل برقرار رکھا۔