صوابی ،ہوٹل پر پانی پینے کے دوران نامعلوم موٹر سائیکل سواروں نے فائرنگ کر کے دو پولیس اہلکاروں کو شہید کردیا

ہفتہ 21 جون 2025 21:41

صوابی (اُردو پوائنٹ اخبارتازہ ترین - این این آئی۔ 21 جون2025ء)خیبرپختونخوا کے ضلع صوابی میں واقع پولیس سٹیشن گدون انڈسٹریل اسٹیٹ کے دو اہلکاروں کو ہوٹل پر پانی پینے کے دوران دو نامعلوم موٹر سائیکل سواروں نے اندھا دھند فائرنگ کر کے شہید کردیا۔

(جاری ہے)

پولیس تھانہ آئی ڈی ایس کی رپورٹ کے مطابق گزشتہ شب سوا دس بجے پی اے ایس آئی بلال خان ، کانسٹیبل قادر نواز ، ڈرائیور زاہد سکنہ مزغنڈ گدون اور کانسٹیبل جمال الدین سکنہ بیر گلی گدون سرکاری موبائل گاڑی میں گشت کر رہے تھے، پیاس محسوس ہونے پر ڈرائیور زاہد نے پانی پینے کے لئے اجازت لے گاڑی روک لی ، ساتھ کانسٹیبل جمال الدین بھی اتر کر ٹوپی روڈ پر واقع باچہ ہوٹل جاکر وہاں پانی پی رے تھے کہ اس دوران دو نامعلوم موٹر سائیکل سوار افراد نے آکر پستولوں سے ان پر فائرنگ شروع کردی جس کے نتیجے میں دونوں موقع پر شہید ہو گئے ،ملزمان فرار ہوگئے اور پولیس نے گرفتاری کے لیے علاقے میں سرچ آپریشن شروع کردی ہے ، دونوں شہدا کی لاشیں پوسٹمارٹم کے لیے تحصیل ہیڈ کوارٹر ہسپتال ٹوپی منتقل کر دی گئی اور بعد ازاں ہفتہ کی علی الصبح پولیس لائن شاہ منصور (صوابی) میں نماز جنازہ ادا کردی گئی ،پولیس کے چاق و چوبند دستے نے شہدا کو سلامی پیش کی، جنازہ میں ریجنل پولیس آفیسر مردان نجیب الرحمن بگوی،ڈسٹرکٹ پولیس آفیسر صوابی محمد اظہر خان،ایس پی انوسٹی گیشن افتخار علی ،سرکل ایس ڈی پی اوز سمیت افسران ، اہلکاران اور شہدا کے ورٹا نے شرکت کی ، بعد ازاں دونوں شہدا کو ان کے آبائی قصبوں میں پورے سرکاری اعزاز کے ساتھ سپردِ خاک کر دئیے گئے ، اس موقع پر آر پی او مردان نجیب الرحمن بگوی اور ڈی پی او صوابی محمد اظہر خان نے شہید جوانوں کو خراج عقیدت پیش کرتے ہوئے کہا کہ دکھ کی گھڑی میں سوگوار خاندان کے ساتھ کھڑے ہیں،انہوں نے کہا کہ اس قربانی کو فراموش نہیں کیا جائے گا، فائرنگ کرنے والے شرپسند عناصر کو قانون کی گرفت میں لاکر دم لیں گے، اور فائرنگ کرنے والے شرپسند عناصر کیخلاف سرچ آپریشن جاری ہے۔