Live Updates

پٹرولیم مصنوعات کی قیمتوں میں 180 روپے کے خوفناک اضافے کا خدشہ

ایران اور اسرائیل کی جنگ کی وجہ سے پاکستان پر بھیانک معاشی اثرات پڑنے سے متعلق خبردار کر دیا گیا

محمد علی ہفتہ 21 جون 2025 20:40

لاہور (اُردو پوائنٹ اخبارتازہ ترین۔ 21 جون2025ء) پٹرولیم مصنوعات کی قیمتوں میں 180 روپے کے خوفناک اضافے کا خدشہ تفصیلات کے مطابق ایران اور اسرائیل کی جنگ کی وجہ سے پاکستان پر بھیانک معاشی اثرات پڑنے سے متعلق خبردار کر دیا گیا۔ ایکسپریس نیوز کی رپورٹ کے مطابق نجی تھنک ٹینک تولہ ایسوسی ایٹس نے خطے کی موجودہ کشیدہ صورتحال میں پاکستان کے حوالے سے خطرے کی گھنٹی بجا دی ہے۔

رپورٹ میں خدشہ ظاہر کیا گیا ہے کہ ایران اور اسرائیل تنازع کے نتیجے میں پاکستان کی معیشت کو شدید دھچکا لگ سکتا ہے۔ عالمی مارکیٹ میں تیل کی عالمی قیمت میں حالیہ اضافے سے مہنگائی، کرنٹ اکاونٹ خسارہ اور روپے کی قدر میں کمی کے خطرات بڑھ گئے ہیں۔ خاص کر پاکستان میں تیل کی قیمتوں میں ہوشربا اضافے کا خدشہ پیدا ہو گیا ہے۔

(جاری ہے)

صرف چند ہی دنوں میں عالمی مارکیٹ میں تیل کی فی بیرل قیمتوں میں 13 ڈالرز سے زائد کا اضافہ ہو چکا ہے۔

اگر عالمی مارکیٹ میں تیل کی قیمتوں 100 ڈالرز سے تجاوز کر گئیں تو اس کے پاکستان پر تباہ کن اثرات ہوں گے۔ تیل کی قیمتیں بڑھنے سے پاکستان میں روپیہ مزید کمزور ہو گا اور پٹرولیم مصنوعات کی قیمتوں میں 20 سے 180 روپے تک کا اضافہ ہو سکتا ہے۔ آئندہ مالی سال کے آغاز پر وفاقی حکومت پٹرولیم لیوی میں بھی اضافہ کرنے کا ارادہ رکھتی ہے، اس اقدام سے پٹرولیم مصنوعات کی قیمتوں میں ہوشربا اضافہ متوقع ہے۔

دوسری جانب اوگرا نے وضاحت کی ہے کہ ملک کی موجودہ ضروریات پوری کرنے کیلئے پیٹرولیم مصنوعات کے وافر ذخائر موجود ہیں۔ میڈیا کے مطابق ملک میں پٹرولیم مصنوعات کے وافر ذخائر موجود ہیں، پیٹرولیم مصنوعات کے ذخائر موجودہ تیل کی طلب پوری کرنے کیلئے کافی ہیں، اوگرا نے آئل مارکیٹنگ کمپنیوں کو 20 دن کا لازمی ذخیرہ برقرار رکھنے کی ہدایت کردی ہے۔