ایرانی ایٹمی تنصیبات پر امریکی حملہ بین الاقوامی قانون کی خلاف ورزی ہے،رضا ربانی

اتوار 22 جون 2025 21:55

اسلام آباد (اُردو پوائنٹ اخبارتازہ ترین - این این آئی۔ 22 جون2025ء)سابق چیئرمین سینیٹ میاں رضا ربانی نے کہا ہے کہ ایران کی ایٹمی تنصیبات پر امریکا کا حملہ بین الاقوامی قانون کی صریح خلاف ورزی ہے، ایران کی ایٹمی تنصیبات آئی اے ای اے کی نگرانی میں ہیں، ان پر حملے کی شدید مذمت کرتے ہیں۔

(جاری ہے)

اپنے ایک بیان میں میاں رضا ربانی نے کہا کہ یہ حملہ پورے خطے کو غیر مستحکم کر چکا ہے اور دنیا کو جنگ کے دہانے پر لاکھڑا کیا ہے، او آئی سی فوری مشترکہ اقدامات کرے تاکہ امریکا کی مزید جارحیت کو روکا جا سکے۔

انہوں نے کہا کہ ایرانی ایٹمی ہتھیاروں کا ڈھول عراق کی یاد دلاتا ہے، یہ خطرناک مثالیں قائم کی جا رہی ہیں، کل کوئی اور ملک اس کا شکار بن سکتا ہے۔ رضا ربانی نے کہا کہ اس آزمائش کی گھڑی میں پاکستانی عوام ایران کے عوام کے ساتھ مکمل یکجہتی کا اظہار کرتے ہیں، ایسے حملوں کے ذریعے عالمی سلامتی اور قانون کے اصولوں کو پامال کیا جا رہا ہے۔انہوںنے کہاکہ امریکا نے جو کیا ہے وہ بین الاقوامی قانون، ریاستوں کے باہمی تعلقات اور بین الاقوامی انسانی قانون کی خلاف ورزی ہے۔