خواتین کی سیاسی شمولیت پر "بول اٹھو" مہم کے تحت قاسم آباد میں اہم تقریب، آئینی کردار اور قیادت پر زور

حیدرآباد (اُردو پوائنٹ اخبارتازہ ترین - اے پی پی۔ 24 جون2025ء) خواتین کی سیاسی شمولیت کو فروغ دینے کے لیے جاری مہم "بول اٹھو" کے تحت قاسم آباد ٹاؤن آفس میں ایک اہم اور بامقصد تقریب کا انعقاد کیا گیا، جس کی میزبانی شِرکت گاہ نے کی۔ سماجی رہنما صبا ظہور عباسی کی قیادت میں ھونے والی اس تقریب کا مقصد نو منتخب اور محروم طبقات سے تعلق رکھنے والی خواتین کونسلرز کو مقامی حکومت کے نظام میں ان کے آئینی کردار، اختیارات اور ذمہ داریوں سے آگاہ کرنا تھا۔

افتتاحی خطاب میں صبا ظہور عباسی نے کہا کہ یہ محض ایک تقریب نہیں بلکہ ایک خواب کی تعبیر ہے وہ خواب جس میں عورت صرف ووٹر نہیں بلکہ بااختیار رہنما اور فیصلہ ساز کے طور پر سامنے آتی ہے۔ تقریب میں حیدرآباد کے مختلف علاقوں سے منتخب خواتین نمائندگان، بلدیاتی افسران، سول سوسائٹی کے ارکان اور سماجی کارکنوں نے شرکت کی۔

(جاری ہے)

مہمانِ خصوصی اسسٹنٹ الیکشن کمشنر، مقامی حکومت کی اسسٹنٹ ڈائریکٹر صدف، اور ہیومن رائٹس کمیشن آف پاکستان کی نمائندہ غفرانہ نے خواتین کی سیاسی شمولیت، آئینی حقوق اور انسانی وقار سے متعلق تفصیلی روشنی ڈالی۔

چیئرمین ٹاؤن قاسم آباد عبدالغفور درس نے اپنے خطاب میں اس مہم کو سراہتے ہوئے کہا کہ خواتین کی سیاسی شمولیت وقت کی اہم ضرورت ہے، اور 'بول اٹھو' جیسے پلیٹ فارمز اس حوالے سے قابلِ تحسین خدمات انجام دے رہے ہیں۔ ان کا کہنا تھا کہ خواتین کو الیکشن لڑنے اور قیادت کرنے کا پورا حق حاصل ہے، اور ہمیں شہید محترمہ بینظیر بھٹو کی قیادت سے سبق لینا چاہیے، جنہوں نے ایشیا بھر کی خواتین کے لیے نئی راہیں کھولیں۔

تقریب میں انٹرایکٹو سرگرمیوں، اظہارِ رائے کی مشقوں، اور گروپ مکالمات کے ذریعے شرکاء میں خود اعتمادی اور قیادت کے رجحانات کو اجاگر کیا گیا۔ شرکت کرنے والی خواتین کو گلاب کے پھول اور حوصلہ افزا اقتباسات پیش کیے گئے، جو ان کی خدمات اور سیاسی کردار کا اعتراف تھا۔ اس موقع پر مقررین نے اس بات پر زور دیا کہ ایسی تقریبات کا تسلسل بہت ضروری ہے تاکہ خواتین کو ان کے آئینی کردار سے نہ صرف روشناس کرایا جا سکے بلکہ انہیں قیادت کے لیے تیار بھی کیا جائے۔ تقریب کے اختتام پر شِرکت گاہ اور اس کے مقامی شراکت داروں کا شکریہ ادا کیا گیا، اور اس عزم کا اعادہ کیا گیا کہ خواتین کی باوقار، بااختیار اور مساوی سیاسی شمولیت کو یقینی بنانے کے لیے جدوجہد جاری رہے گی۔