بگ بیش لیگ میں قومی کرکٹرز کے معاہدے کا تعلق بورڈز کی سپورٹ سے نکلا

بی بی ایل ڈرافٹ میں مجموعی طور پر 7 پاکستانی کھلاڑی منتخب کیے گئے ہیں : ذرائع

ذیشان مہتاب بدھ 25 جون 2025 16:01

بگ بیش لیگ میں قومی کرکٹرز کے معاہدے کا تعلق بورڈز کی سپورٹ سے نکلا

سڈنی (اردو پوائنٹ تازہ ترین اخبار ۔ 25 جون 2025ء) کرکٹ آسٹریلیا کے پاکستان پر اعتماد بحال ہونے سے پاتھ وے سیریز کے امکانات بھی بڑھنے لگے۔

پاکستان کرکٹ بورڈ کے شعبہ ہائی پرفارمنس نے کرکٹ کی بہتری کیلئے آسٹریلیا سمیت دیگر کو ٹارگٹ کیا ہے، دونوں ممالک کے بورڈز کے درمیان بہتر تعلقات کی وجہ سے بڑی تعداد میں پاکستانی کرکٹرز بی بی ایل میں گئے، بی بی ایل کے این او سی کا معاملہ بھی حل ہوا ، ماضی میں این او سی معاملہ لٹکا رہتا تھا۔

ذرائع کے مطابق اس مرتبہ ڈرافٹ سے قبل ہی کرکٹرز کو این او سی جاری ہو ئے، اے ٹیم ، انڈر 19 اور ویمن ٹیموں کے باہمی دورں کے حوالے سے بھی بات چیت جاری ہے جب کہ پی سی بی کا شعبہ ہائی پرفارمنس اکیڈمیز ایکسچینج پروگرامز کا بھی خواہش مند ہے۔

(جاری ہے)

ذرائع کیمطابق ڈائریکٹر عاقب جاوید کھلاڑیوں کے ایکسپوڑر کے لیے آسٹریلیا اور انگلینڈ کے علاوہ دیگر ممالک بھی مواقع تلاش کررہے ہیں اور چاہتے ہیں کہ ان ممالک میں زیادہ سے زیادہ کھلاڑی جائیں، اس کے لیے تعلقات کا بہتر ہونا ضروری ہے۔

ذرائع نے بتایا کہ اعتماد کی بحالی کی وجہ سے آئندہ پی ایس ایل کے لیے بھی مزید آسٹریلوی کھلاڑی دستیاب ہوں گے جب کہ چند روز قبل کرکٹ آسٹریلیا کے سی ای او ٹوڈ گرین برگ نے بھی آئندہ برس ٹیم کے دورہ پاکستان کی تصدیق کی تھی۔

ای ایس پی این کرک انفو کے مطابق بی بی ایل ڈرافٹ میں مجموعی طور پر 7 پاکستانی کھلاڑی منتخب کیے گئے ہیں۔