ملالہ یوسف زئی کا عالمی سطح پر خواتین کے کھیلوں میں سرمایہ کاری کا اعلان

خواتین کے کھیلوں میں سرمایہ کاری کی کمی ہے جس کے باعث خواتین کو مقابلے کے مواقع نہیں مل پاتے، نوبیل انعام یافتہ سماجی کارکن کا سی این این کو انٹرویو

ذیشان مہتاب بدھ 25 جون 2025 17:05

ملالہ یوسف زئی کا عالمی سطح پر خواتین کے کھیلوں میں سرمایہ کاری کا اعلان

نیویارک (اردو پوائنٹ تازہ ترین اخبار ۔ 25 جون 2025ء ) نوبیل انعام یافتہ پاکستانی نژاد برطانوی سماجی کارکن ملالہ یوسف زئی نے دنیا بھر میں خواتین کی کھیلوں میں شمولیت بڑھانے اور مواقع فراہم کرنے کے لیے ایک نئے منصوبے کا اعلان کیا ہے، جس کے تحت پیشہ ورانہ و شوقیہ ٹیموں میں سرمایہ کاری کی جائے گی۔

ڈان اخبار میں شائع رپورٹ کے مطابق ملالہ یوسف زئی اور ان کے شوہر عصر ملک نے ’ریسس‘کے نام سے اس منصوبے کا آغاز کیا ہے، جس کے تحت پیشہ ورانہ اور شوقیہ ٹیموں میں سرمایہ کاری کی جائے گی تاکہ خواتین کی کھیلوں میں شمولیت کو یقینی بنایا جا سکے۔

امریکی نشریاتی ادارے ’سی این این‘ کو دیے گئے ایک انٹرویو میں سوات سے تعلق رکھنے والی ملالہ یوسف زئی نے پاکستان میں اپنے اسکول کے دنوں کو یاد کرتے ہوئے بتایا کہ اُس وقت لڑکیوں کو کھیلوں میں حصہ لینے کے بہت کم مواقع میسر تھے۔

(جاری ہے)

انہوں نے کہا کہ انہیں یاد ہے کہ اسکول میں بریک کے وقت لڑکے تو کرکٹ کھیلنے کے لیے میدان میں چلے جاتے تھے، لیکن لڑکیوں کو پیچھے رکنا پڑتا تھا۔

ملالہ نے کہا کہ انہیں اسی وقت اندازہ ہو گیا تھا کہ کھیلوں تک لڑکیوں کی رسائی آسان نہیں ہے۔ انہوں نے مزید کہا کہ کھیل ایک طاقتور ذریعہ ہے جو معاشرے کو آپس میں جوڑتا ہے۔

ان کا کہنا تھا کہ ہم کھیل کے دوران ایک دوسرے کے مقابل ہو سکتے ہیں، لیکن کھیل ختم ہونے کے بعد ہم گلے لگ سکتے ہیں، ہاتھ ملا سکتے ہیں اور یہ تسلیم کر سکتے ہیں کہ ہم سب ایک ہی انسانیت کا حصہ ہیں۔

ملالہ یوسف زئی نے کہا کہ خواتین کے کھیلوں میں سرمایہ کاری کی کمی ہے، جس کے باعث خواتین کو مقابلے کے مواقع نہیں مل پاتے۔

ملالہ اور ان کے شوہر عصر ملک اس صورتحال کو بدلنے کے خواہاں ہیں۔ ان کا کہنا تھا کہ ہم ایک ایسا موقع تلاش کر رہے تھے جہاں ہم اپنی مہارت اور پلیٹ فارم کو خواتین کے کھیلوں کے فائدے کے لیے استعمال کر سکیں۔

انہوں نے امریکا کی نیشنل ویمنز ساکر لیگ اور ویمنز نیشنل باسکٹ بال ایسوسی ایشن کی نشاندہی کی ہے، جن میں وہ سرمایہ کاری کرنے کا ارادہ رکھتے ہیں۔