کراچی، طارق روڈ پرمریض کو چیک کرنے کے لیے جانے والی نرس غائب، پولیس نے مقدمہ درج کرلیا

بدھ 25 جون 2025 22:31

کراچی (اُردو پوائنٹ اخبارتازہ ترین - این این آئی۔ 25 جون2025ء)سندھ ہائیکورٹ نے تھانہ اقبال مارکیٹ کی حدود سے لاپتا نرس کی گمشدگی کی درخواست پر سماعت ملتوی کردی۔رپورٹ کے مطابق ہائیکورٹ میں تھانہ اقبال مارکیٹ کی حدود سے لاپتا نرس کی گمشدگی کی درخواست کی سماعت ہوئی۔درخواستگزار کے وکیل نے موقف دیا کہ 11 فروری 2025 کو درخواستگزار کی بیٹی بسمہ طارق روڈ پر کسی مریض کو چیک کرنے گئی تھی۔

اسی رات سے لڑکی غائب ہے تاحال کچھ پتہ نہیں چل سکا۔ لڑکی کی گمشدگی کا مقدمہ تھانہ اقبال مارکیٹ میں درج ہے۔جسٹس عمر سیال نے ریمارکس دیئے کہ نارمل اغوا کا کیس ہے، آپ نے مقدمہ درج کروا دیا۔ درخواستگزار کے وکیل نے موقف دیا کہ کسی اغوا کار کی جانب سے تاحال درخواستگزار کو کوئی کال نہیں آئی۔

(جاری ہے)

جسٹس عمر سیال نے ریمارلس دیئے کہ کیس کی تحقیقات پولیس کر رہی ہے، اس کے باوجود آپ نے ہائیکورٹ میں بھی درخواست دائر کردی، اس طرح کے کیسز دائر کرنے سے دنیا میں تاثر جاتا ہے کہ پاکستان میں لوگوں کو ایجنسیاں غائب کر دیتی ہیں۔

انہوں نے مزید ریمارکس دیے کہ آپ لوگ ہائیکورٹ سے زیادتی کررہے ہیں، آپ ہائیکورٹ کو تباہ کررہے ہیں۔ اغوا کا کیس ہوتا ہے آپ لوگ ہائیکورٹ میں مسنگ کی درخواست دائر کر دیتے ہیں، ان درخواستوں کے باعث جو جیل میں ہیں ان کی اپیلیں التوا کا شکار ہیں۔درخواست مسترد کردیتے لیکن یہ کیس ریگولر بینچ کا ہے، وہی بینچ فیصلہ کرے گی۔ عدالت نے درخواست کی سماعت غیر معینہ مدت تک ملتوی کردی۔