منشیات کا غلط استعمال اوراس کی غیر قانونی ترسیل ایک عالمی چیلنج ہے ، صدرمملکت

ِ اسلام آباد(اُردو پوائنٹ اخبارتازہ ترین - آن لائن۔ 25 جون2025ء) صدر مملکت آصف علی زرداری نے کہا ہے کہ آج ہم منشیات کے غلط استعمال اور غیر قانونی اسمگلنگ کے خلاف عالمی دن منا رہے ہیں اور اس عزم کا اعادہ کرتے ہیں کہ ہم اپنے معاشرے سے منشیات کے ناسور کو ختم کرنے کے لیے بھرپور کوششیں جاری رکھیں گے۔منشیات کے غلط استعمال اور غیر قانونی اسمگلنگ کے خلاف عالمی دن کے موقع پر پیغام میں صدر مملکت نے کہا کہ اس سال کا موضوع ‘‘زنجیر کو توڑنا: سب کے لیے بچاؤ اور بحالی’’ اس بات پر زور دیتا ہے کہ منشیات کی ترسیل کے نیٹ ورکس کو توڑنا اور اس مسئلے کے خاتمے کے لیے جامع اور مربوط حکمت عملی اختیار کرنا وقت کی اہم ضرورت ہے۔

صدر مملکت نے کہا کہ منشیات کا غلط استعمال اور اس کی غیر قانونی ترسیل ایک عالمی چیلنج ہے، جس سے نمٹنے کے لیے مسلسل اور مشترکہ بین الاقوامی تعاون کی ضرورت ہے۔

(جاری ہے)

پاکستان اس لعنت کے خاتمے کے لیے پٴْرعزم اقدامات کر رہا ہے اور تمام بین الاقوامی و کثیرالملکی کوششوں کی حمایت کرتا ہے۔منشیات اور غیر قانونی نشہ آور اشیائ نہ صرف عوامی صحت کے لیے سنگین خطرہ ہیں بلکہ ہماری نوجوان نسل کے مستقبل کو بھی داؤ پر لگا دیتی ہیں۔

حکومتِ پاکستان منشیات کے خاتمے کے لیے پٴْرعزم ہے۔ وزارت داخلہ اور انسدادِ منشیات کے تحت کام کرنے والی انسدادِ منشیات فورس (اے این ایف) نے اس سلسلے میں نمایاں کردار ادا کیا ہے۔ انہوں نے کہا کہ ہمیں معاشرے بالخصوص نوجوانوں میں منشیات کے نقصانات سے متعلق شعور اجاگر کرنے اور ان کی تعلیم و تربیت کو فروغ دینے کی ضرورت ہے تاکہ ہم ایک محفوظ اور صحت مند معاشرہ قائم کر سکیں۔

ایک ہمہ گیر حکمت عملی کے تحت بچاؤ، تعلیم، علاج اور مؤثر قانون نافذ کرنے جیسے اقدامات کے ذریعے ہم منشیات سے پاک پاکستان کی جانب بڑھ رہے ہیں۔ہم سمجھتے ہیں کہ بچاؤ کا آغاز گھر، اسکول اور کمیونٹی سے ہوتا ہے۔ منشیات کے شکار افراد کے لیے دوبارہ بحالی کی سہولیات تک رسائی بھی اتنی ہی ضروری ہے۔ منشیات کے خاتمے کے لیے سرکاری اداروں، سول سوسائٹی، نجی شعبے اور بین الاقوامی شراکت داروں کے مابین تعاون نہایت اہم ہے۔

صدر مملکت نے کہا کہ اس دن کے موقع پر، میں اٴْن بہادر سپاہیوں کو بھی خراجِ عقیدت پیش کرتا ہوں جنہوں نے اس مقدس مشن میں اپنی جانوں کا نذرانہ پیش کیا۔ ان کی قربانی پاکستان کے اس عزم کی علامت ہے کہ ہم منشیات کے خلاف جنگ جاری رکھیں گے۔میں تمام شہریوں سے اپیل کرتا ہوں کہ وہ منشیات کے خاتمے کے لیے قومی کوششوں کا حصہ بنیں اور ایک صحت مند و محفوظ پاکستان کی تعمیر میں کردار ادا کریں۔ ہم اپنے اداروں اور بحالی مراکز کو مزید مضبوط بنائیں گے اور تعلیم و آگاہی میں سرمایہ کاری جاری رکھیں گے۔ آئیں، ہم سب مل کر اپنی آنے والی نسلوں کو منشیات کے اثرات سے محفوظ مستقبل دیں اور ایک ایسا معاشرہ تشکیل دیں جہاں ہر فرد نشہ سے پاک زندگی گزار سکے۔