وفاقی وزیر نے اوکاڑہ اسٹیشن پر کراچی ایکسپریس کا اسٹاپ بحال کر دیا

ریلوے کی رابطہ ایپ اور لائیو ٹریکنگ ایپ پر بھی اپ ڈیٹ کیا جائے،مطالبہ

جمعرات 26 جون 2025 17:46

وفاقی وزیر نے اوکاڑہ اسٹیشن پر کراچی ایکسپریس کا اسٹاپ بحال کر دیا

حجرہ شاہ مقیم (اُردو پوائنٹ اخبارتازہ ترین - این این آئی۔ 26 جون2025ء)وفاقی وزیر ریلوے حنیف عباسی کی خصوصی ہدایت پر نائٹ کوچ کراچی ایکسپریس (16DN/15UP) کا اوکاڑہ ریلوے اسٹیشن پر اسٹاپ دوبارہ بحال کر دیا گیا، جس پر شہریوں اور مسافروں نے وفاقی وزیر کے اس عوام دوست اقدام پر بھرپور اظہار تشکر کیا ہے،اہل ِضلع اوکاڑہ نے وفاقی وزیر ریلوے حنیف عباسی اور چیف ایگزیکٹو آفیسر پاکستان ریلوے عامر علی بلوچ سے اپیل کی ہے کہ بحال شدہ اسٹاپ کو فوری طور پر پاکستان ریلوے کی رابطہ ایپ اور لائیو ٹریکنگ ایپ پر بھی اپ ڈیٹ کیا جائے، اس اقدام سے نہ صرف گھر بیٹھے آن لائن ٹکٹ بکنگ میں آسانی ہوگی بلکہ مسافروں کو اسٹاپ سے متعلق بروقت معلومات اور ٹرین کی آمد و روانگی کے اوقات بھی دستیاب ہوں گے،شہریوں کا کہنا ہے کہ وفاقی وزیر ریلوے کا یہ اقدام ریلوے نظام کی بہتری اور مسافروں کی سہولت کے لیے ایک اہم سنگِ میل ہے،جس سے ریلوے پر عوام کا اعتماد بڑھے گا اور مسافروں کی تعداد میں اضافہ ہوگا،ریلوے حکام سے مطالبہ کیا گیا ہے کہ ڈیجیٹل پلیٹ فارمز پر اسٹاپ کی مکمل اپ ڈیٹ جلد از جلد یقینی بنائی جائے تاکہ جدید سہولیات سے استفادہ ممکن ہو اور اس فلاحی فیصلے سے زیادہ سے زیادہ شہری فائدہ اٹھا سکیں۔