شاہدرہ میں مکان کی چھت گرنے سے 2 کمسن بچے جاں بحق تین زخمی ہو گئے

لاہور(اردوپوائنٹ اخبار تازہ ترین۔28جون 2025)صوبائی دارالحکومت لاہور کے علاقے شاہدرہ میں مکان کی چھت گرنے سے  2کمسن بچے جاں بحق تین زخمی ہوگئے،حادثے کے وقت تمام افراد گھر کے اندر موجود تھے،واقعہ کی اطلاع ملتے ہی ریسکیو اہلکار اور پولیس کی نفری موقع پر پہنچ گئی،ریسکیو اہلکاروں نے زخمیوں کو فوری طور پر ہسپتال منتقل کیا،افسوسناک حادثہ شاہدرہ کے علاقے عباس نگر میں پیش آیا۔

جاں بحق ہونے والے بچوں کی شناخت 9 سالہ عائشہ اور 11 سالہ حسنین کے نام سے ہوئی ہے، جبکہ زخمیوں میں 35 سالہ عتیق، 30 سالہ سمیرا اور 6 سالہ سلیمان شامل ہیں۔ حادثے کے وقت تمام افراد گھر کے اندر موجود تھے۔ پولیس کے مطابق حادثہ عتیق نامی شہری کے گھر پیش آیا، جہاں ایک ہی خاندان کے پانچ افراد ملبے تلے دب گئے۔

(جاری ہے)

پولیس کا کہنا ہے کہ واقعے کے فوراً بعد اہلِ محلہ نے اپنی مدد آپ کے تحت امدادی کارروائیاں شروع کیں اور ملبے میں دبے افراد کو نکالا۔

دوسری جانب پنجاب میں 25 سے 27 جون کے دوران بارشوں سے ہونے والے مختلف حادثات میں 13 افراد جاں بحق اور 39 زخمی ہوگئے۔ریسکیو 1122 کے مطابق گزشتہ 24 گھنٹوں کے دوران 46 افراد کو ایمرجنسی سروسز فراہم کی گئیں جن میں سے 39 کو ہسپتال منتقل کیا گیا جبکہ 7 جانبر نہ ہو سکے۔ سب سے زیادہ حادثات اوکاڑہ میں رپورٹ ہوئے جن کی تعداد 8 تھی، جبکہ ملتان میں 4، فیصل آباد، منڈی بہاالدین، جھنگ اور چنیوٹ میں 2، 2 اور لاہور، قصور، جہلم، ساہیوال، مری، مظفرگڑھ، بہاولنگر اور خانیوال میں ایک، ایک واقعہ پیش آیا۔

جہلم اور مظفرگڑھ میں 2،2 افراد جاں بحق ہوئے جبکہ اوکاڑہ، بہاولنگر اور خانیوال میں ایک ایک شخص جان سے گیا۔اسی طرح مظفرگڑھ میں مکان کی دیوار گرنے سے 2 افراد ملبے تلے دب کر جاں بحق ہوئے۔ قصور میں چھت گرنے سے 2 لڑکیاں جان کی بازی ہار گئیں جبکہ بہاولنگر میں بھی ایک شخص اسی نوعیت کے حادثے کا شکار ہوا۔ خانیوال اور ٹوبہ ٹیک سنگھ میں کھیتوں میں کام کرتے ہوئے دو کسان آسمانی بجلی کی زد میں آکر جاں بحق ہو گئے۔

پی ڈی ایم اے پنجاب کے مطابق 3 دنوں میں مختلف شہروں میں 25 حادثات رپورٹ ہوئے ہیں۔ترجمان پی ڈی ایم اے کا کہنا ہے کہ بارشوں کے دوران چھتیں، دیواریں اور بجلی گرنے کے واقعات رپورٹ ہوئے جبکہ زیادہ اموات چھتیں اور دیواریں گرنے سے ہوئیں۔ ڈی جی پی ڈی ایم اے پنجاب عرفان علی کاٹھیا کا کہنا ہے کہ وزیراعلیٰ مریم نواز کی ہدایات کے مطابق جاں بحق افراد کے لواحقین کی مالی معاونت کی جائے گی۔ڈی جی پی ڈی ایم اے نے شہریوں سے اپیل کی کہ مخدوش اور بوسیدہ مکانات میں رہائش اختیار نہ کی جائے، بچوں کا خیال رکھیں اور برساتی نالوں، بجلی کی تاروں اور کھمبوں کے قریب نہ جائیں۔