بھارت میں سائنسی تحقیق کا بحران، مودی حکومت کے دعوے زمینی حقائق کے برعکس

نئی دہلی (اُردو پوائنٹ اخبارتازہ ترین - اے پی پی۔ 28 جون2025ء) بھارت میں علمی تحقیق اور سائنس کی ترقی کے دعوے مودی حکومت کی تقاریر تک محدود ہو کر رہ گئے ہیں جبکہ زمینی حقائق اس کے برعکس بدحالی اور مالی بحران کی عکاسی کررہے ہیں۔کشمیرمیڈیاسروس کے مطابق الجزیرہ کی ایک رپورٹ میں انکشاف کیا گیا ہے کہ سائنسی تحقیق اور ترقی کے لئے مخصوص حکومتی اسکیم'' وِگیان دھارا'' محض ایک سیاسی ڈرامہ ہے۔

بھارتی حکومت کی INSPIREاسکیم کے تحت محققین گزشتہ 9ماہ سے وظائف سے محروم ہیں جس کے باعث کئی محققین قرض لینے یا تحقیق چھوڑنے پر مجبور ہو چکے ہیں۔الجزیرہ کے مطابق تحقیق کے لئے 70فیصد بجٹ نجی اداروں کو سود سے پاک قرضوں کی شکل میں بانٹ دیا گیا، جبکہ INSPIREجیسے تحقیقی منصوبوں پر 22فیصد بجٹ کٹوتی کردی گئی۔

(جاری ہے)

وِگیان دھارا کی آڑ میں اصل کٹوتیوں کو عوام سے چھپایا گیا۔

نئی اسکیم وِگیان دھارا نے وظائف کی ادائیگی کو بحران اور بدنظمی کی دلدل میں دھکیل دیا ہے اور حکومتی فنڈز کی عدم ادائیگی کے باعث محققین لیپ ٹاپ تک خریدنے سے قاصر ہیں اور ان کی بچتیں بھی ختم ہوچکی ہیں۔رپورٹ کے مطابق بھارتی IITsاور IISERsکے محققین بیوروکریسی کی بے حسی، مبہم جوابات اور حکومتی نظراندازی کا شکار ہیں اور محققین تین سے نو ماہ تک بغیر کسی وظیفے کے گزارا کرنے پر مجبور ہیں۔

رپورٹ میں بتایا گیا کہ وِگیان دھارا کے بجٹ میں 67.5فیصد کمی کی گئی ہے جو 2016-17کے 43.89ارب روپے سے کم ہو کر 2025-26 میں محض 14.25ارب روپے رہ گیا ہے۔الجزیرہ کو دیے گئے انٹرویوز میں بھارتی محققین نے شکایات کرتے ہوئے کہا کہ وہ وظیفہ نہ ملنے کے باعث سالانہ کانفرنس میں شرکت نہیں کرسکے۔ایک فیکلٹی فیلو نے بتایا کہ ستمبر 2024سے اب تک انہیں ادائیگیاں موصول نہیں ہوئیں جس سے ان کی پیشہ ورانہ سرگرمیاں متاثر ہو رہی ہیں۔

ایک پی ایچ ڈی اسکالر نے کہا کہ ہم نے بار بار کالز اور ای میلز کیں، لیکن اکثر کا کوئی جواب نہیں آیا یا صرف مبہم اور بعض اوقات بدتمیز ی سے جواب ملا۔ایک اور اسکالر نے کہا کہ سرکاری بے حسی نے سائنسدانوں کی زندگی اجیرن بنا دی ہے، کوئی سننے والا نہیں۔یہ صورتحال بھارت میں سائنس، تحقیق اور نوجوان محققین کے مستقبل پر ایک سنگین سوالیہ نشان لگا رہی ہے اور مودی حکومت کے آتم نربھر اور وِگیان دھارا کے دعوے زمینی حقائق سے یکسر مختلف ثابت ہو رہے ہیں۔