پولیو اوور سائٹ بورڈ کے وفد کی وزیرِ صحت سے ملاقات،وفد کو پولیو کے خاتمے کیلئے جاری حکومتی اقدامات پر بریفنگ

وزیراعظم کی قیادت میں پاکستان کو جلد پولیو سے پاک کیا جائے گا اور اس کے لیے ہم تمام ریاستی وسائل بروئے کار لائیں گے، وفاقی وزیر

جمعرات 3 جولائی 2025 17:56

پولیو اوور سائٹ بورڈ کے وفد کی وزیرِ صحت سے ملاقات،وفد کو پولیو کے خاتمے ..

اسلام آباد (اُردو پوائنٹ اخبارتازہ ترین - این این آئی۔ 03 جولائی2025ء)پولیو اوور سائٹ بورڈ (پی او بی) کے ایک اعلیٰ سطحی وفد نے وفاقی وزیرِ صحت، سید مصطفی کمال، سے ملاقات کی۔ وفد کی قیادت جی پی ای آئی کے پولیو اوور سائٹ بورڈ (پی او بی) کے چیئرمین اور گیٹس فاؤنڈیشن میں گلوبل ڈویلپمنٹ کے صدر، ڈاکٹر کرس ایلس، نے کی۔ اس موقع پر وزیرِاعظم کی فوکل پرسن برائے انسدادِ پولیو، عائشہ رضا فاروق، بھی موجود تھیں۔

وزیرِ صحت نے وفد کو پاکستان میں پولیو کے خاتمے کے لیے جاری حکومتی اقدامات، درپیش چیلنجز اور آئندہ کے لائحہ عمل پر تفصیلی بریفنگ دی۔ انہوں نے کہا کہ پولیو کا مکمل خاتمہ حکومتِ پاکستان کی اولین ترجیح ہے اور وفاقی و صوبائی حکومتیں یکسو ہو کر اس مقصد کے لیے کام کر رہی ہیں۔

(جاری ہے)

انہوںنے کہاکہ وزیراعظم کی قیادت میں پاکستان کو جلد پولیو سے پاک کیا جائے گا اور اس کے لیے ہم تمام ریاستی وسائل بروئے کار لائیں گے وزیرصحت نے کہاکہ پولیو کے خاتمے کی جدوجہد میں ہمارے ہیلتھ ورکرز نے اپنی جانوں کا نذرانہ پیش کیا ہے، جو ہمارے پختہ عزم کا ثبوت ہے۔

انہوں نے اس بات پر بھی زور دیا کہ پولیو وائرس اس وقت صرف پاکستان اور افغانستان میں موجود ہے اور ان دونوں ممالک کو پولیو وائرس کے حوالے سے مشترکہ زون تصور کیا جاتا ہے۔ انہوںنے کہاکہ ہم سرحد پار وائرس کے پھیلاؤ کو روکنے کے لیے بیک وقت مہمات کا انعقاد کر رہے ہیں، اور نقل مکانی کرنے والی آبادیوں پر خصوصی توجہ دی جا رہی ہے۔ ہماری خواہش ہے کہ پاکستان اور افغانستان ایک ہی وقت میں پولیو سے پاک ہو جائیں۔

ترجمان وزارتِ صحت کے مطابق اعلیٰ سطحی وفد افغانستان کے دورے کے بعد پاکستان پہنچا ہے اور وہ وزیرِاعظم سمیت دیگر اعلیٰ حکام سے بھی ملاقات کرے گا۔وفد نے پاکستان کے انسدادِ پولیو اقدامات کو سراہا اور پاکستان کے ساتھ تعاون جاری رکھنے کے عزم کا اعادہ کیا۔ وفد میں ڈبلیو ایچ او کی مشرقی بحیرہ روم کی ریجنل ڈائریکٹر ڈاکٹر حنان بلخی، یونیسیف کے جنوبی ایشیا کے ریجنل ڈائریکٹر سنجے وجیسیکرا، روٹری انٹرنیشنل پولیو پلس کمیٹی کے چیئر مائیک میک گورن، اور کے ایس ریلیف کے نمائندے ڈاکٹر زیاد میمش سمیت دیگر اعلیٰ حکام شامل تھے۔