Live Updates

خواجہ سلمان رفیق کا پی ڈی ایم اے ہیڈ آفس کا دورہ ،موسمی صورتحال ،مون سون بارشوں کا جائزہ

جمعہ 4 جولائی 2025 15:31

لاہور (اُردو پوائنٹ اخبارتازہ ترین - این این آئی۔ 04 جولائی2025ء)صوبائی وزیر صحت و چیئرمین کابینہ کمیٹی برائے ڈیزاسٹر مینجمنٹ خواجہ سلمان رفیق نے پی ڈی ایم اے ہیڈ آفس کا دورہ کیا۔خواجہ سلمان رفیق نے موسمی صورتحال اور مون سون بارشوں کا جائزہ لیا۔ایڈیشنل ڈی جی پی ڈی ایم اے سید جواد حیدر نے صوبائی وزیر کو مون سون بارشوں بارے بریفنگ دی۔ صوبائی وزیر صحت و چیئرمین کابینہ کمیٹی برائے ڈیزاسٹر مینجمنٹ خواجہ سلمان رفیق نے کہاکہ مون سون بارشوں کا دوسرا سلسلہ 5 سے 10 جولائی کے دوران جاری رہنے کی پیشگوئی ہے۔

پی ڈی ایم اے پنجاب نے صوبہ بھر کی انتظامیہ کو مون سون بارشوں بارے الرٹ جاری کر دیا ہے۔ 9 اور 10 محرم الحرام کے حوالے سے بھی مون سون بارشوں کا تفصیلی جائزہ لیا۔

(جاری ہے)

ایڈیشنل ڈی جی پی ڈی ایم اے سید جواد حیدر نے صوبائی وزیر کو مون سون بارشوں بارے بریفنگ میں بتایاکہ شدید بارشوں کا سلسلہ 6 جولائی کی رات سے شروع ہو گا۔ رواں سال مون سون بارشیں معمول سے 25 فیصد زیادہ ہونے کی پیشگوئی ہے۔

صوبائی وزیر صحت و چیئرمین کابینہ کمیٹی برائے ڈیزاسٹر مینجمنٹ خواجہ سلمان رفیق نے کہاکہ وزیر اعلیٰ پنجاب مریم نواز شریف کی ہدایات کے مطابق انتظامیہ واسا اور ریسکیو ادارے الرٹ رہیں۔ پی ڈی ایم اے کنٹرول روم و صوبائی ایمرجنسی آپریشن سینٹرز الرٹ ہیں۔ ممکنہ مون سون بارشوں کے باعث اربن فلڈنگ بارے انتظامات کا بھی جائزہ لیا گیا ہے۔

شہریوں کے تحفظ کیلئے تمام تر وسائل بروئے کار لائے جائیں گے۔ صوبائی وزیرخواجہ سلمان رفیق نے کہاکہ واسا سمیت تمام ادارے الرٹ رہیں اور نشیبی علاقوں سے نکاسی آب کو یقینی بنائیں۔پنجاب کے تمام دریاؤں میں پانی کا بہاؤ معمول کے مطابق ہے۔ شہری پی ڈی ایم اے پنجاب کی جاری کردہ ہدایات پر عمل کریں۔دریاؤں ،نہروں اور ندی نالوں میں ہرگز نہ نہائیں۔انتظامیہ دریاؤں، نہروں اور ندی نالوں کے اطراف دفعہ 144 کا نفاذ یقینی بنائے۔