ملک بھر میں یوم عاشور کل عقیدت و احترام سے منایا جائیگا،سکیورٹی کے غیر معمولی انتظامات

لاہور (اُردو پوائنٹ اخبارتازہ ترین - آن لائن۔ 05 جولائی2025ء) ملک بھر میں یوم عاشور کل دس محرم الحرام ( اتوار ) کو نہایت عقیدت و احترام سے منایا جائے گا،تمام چھوٹے بڑے شہروں میں شبیہ ذوالجناح اور تعزیے کے جلوس برآمد ہوںگے ، مجالس عزا برپا ہوں گی جس میں شہدائے کربلا کی عظیم قربانی کا ذکر کیا جائے گا ، تمام قانون نافذ کرنے والے اداروں کی جانب سے یوم عاشور پر سکیورٹی کے غیر معمولی انتظامات کئے گئے ہیں ،موبائل سروس جزوی معطل رکھی جائے گی جبکہ ڈبل سواری پر بھی پابندی ہو گی۔

تفصیلات کے مطابق نواسہ رسول ؐحضرت امام حسین رضی اللہ تعالی عنہ اور شہدائے کربلا کی عظیم قربانیوں کی یاد میں ملک بھر میں یوم عاشور آج (بروز اتوار )کی مناسبت سے تمام چھوٹے بڑے شہروں میں شبیہ ذوالجناح اور تعزیے کے جلوس برآمد ہوںگے جس میں شریک عزادار ماتم اور زنجیر زنی کریں گے ،مجالس میں علماء وذاکرین واقعہ کربلا پر روشنی ڈالیں گے ۔

(جاری ہے)

مساجد اور دیگر مقامات پر بھی یوم عاشور کی مناسبت سے سیمینارز اور کانفرنسز منعقد ہوں گی جس میں علمائے کرام نواسہ رسول ؐ اور ان کے رفقاء کی عظیم قربانی کو موضوع بنائیں گے۔لاہور میں شبیہ ذوالجناح کا مرکزی جلوس نثار حویلی اندرون موچی گیٹ سے رات نویں اور دسویںمحرم کی شب برآمد ہوگا جو اپنے قدیمی راستوں سے ہوتاہوا شام کے وقت کربلا گامے شاہ پہنچ کر اختتام پذیر ہوگا جہاں شام غریباں کی مجالس برپا ہوں گی۔

علاوہ ازیں لاہور کے دیگر مقامات پر شبیہ ذوالجناح اور تعزیے کے جلوس برآمد ہوں گے جس میں شریک عزادار ماتم اورزنجیر زنی کریں گے اور یہ جلوس بھی اپنے روایتی راستوں سے ہوتے ہوئے مقررہ مقام پر پہنچ کر اختتام پذیر ہوں گے۔ملک کے دیگر شہروں میں بھی شبیہ ذوالجناح اور تعزیے کے جلوس برآمد ہوںگے ۔ قانون نافذ کرنے والے اداروں کی جانب سے کسی بھی نا خوشگوار واقعہ سے نمٹنے کے لئے سکیورٹی کے غیر معمول اور فول پروف اقدامات کئے گئے ہیں ۔

جلوسوں کے راستوںمیں آنے والی مارکیٹیں بند رہیں گی اور چھتوں پر سنائپرز کو تعینات کیا جائے گا۔ امن و امان کی مناسبت سے ڈبل سواری پر پابندی ہو گی جبکہ جلوسوں کے روٹس اور مجالس والے علاقوںمیں موبائل فون سروس بھی معطل رکھی جائے گی ۔محکمہ صحت کی طرف سے بھی کسی بھی ہنگامی صورتحال کے پیش نظر تیاریاں مکمل کی گئی ہیں۔علاوہ ازیں گزشتہ روز نویں محرم الحرام کی مناسبت سے لاہور، کراچی، پشاور، کوئٹہ، راولپنڈی سمیت دیگر شہروں میں جلوس نکالے گئے اور مجالس کا انعقاد کیا گیا ۔

سکیورٹی خدشات کے پیش نظر مختلف شہروں میں جلوس کے راستوں پر موبائل فون سروس بھی جزوی طور پر معطل رکھی گئی جبکہ موٹر سائیکل کی ڈبل سواری پر ممنوعہ قرار دی گئی ۔جلوس کے راستوں پر عزاداروں کے لئے سبیلوں اور لنگر کا اہتمام کیا گیا لاہور میں 9ویں محرم الحرام کا مرکزی جلوس پانڈو سٹریٹ اسلامپورہ سے برآمد ہواجو کہ روایتی راستوں اسلام پورہ بازار، سیکرٹریٹ اور پرانی انارکلی سے ہوتا ہوا خیمہ سادات پر اختتام پذیر ہوا۔

جلوس کے راستوں پر سکیورٹی کے سخت انتظامات کئے گئے ہیں، علاقے میں واک تھرو گیٹس لگا دیئے گئے جبکہ خار دار تاریں، کنٹینر اور بیریئر لگا کر جلوس کی آمد گاہ اور راستے کو سیل کر دیا گیا۔ جبکہ جلوس کے راستوں پر دودھ اور شربت کی سبیلوں کا بھی اہتمام کیا گیا ۔ملک بھر میں شبیہ ذوالجناح اور تعزے کے جلوسوں میں شریک عزادار ماتم اور زنجیر زنی کرتے رہے ۔

جبکہ جلوسوں کے راستوں پر دودھ اور شربت کی سبیلوں کا بھی اہتمام کیا گیا ہے۔ اس کے علاوہ مجالس کا بھی اہتمام کیا گیا ۔قانون نافذ کرنے والے اداروں کی طرف سے جلوسوں کی سکیورٹی کے لئے ہزاروں کی تعداد میں اہلکار تعینات رہے ۔صوبائی اور ضلعی کنٹرول رومز بھی قائم کئے گئے جہاں پر جلوسوں کی کیمروں کی مدد سے نگرانی کی جاتی رہی ۔نویں محرم الحرام کے موقع پر بھی موبائل فون سروس جزوی معطل رہی جبکہ موٹر سائیکل کی ڈبل سواری پر پابندی عائد رہی۔