Live Updates

خواجہ فاروق احمد کی امجد نیازی،جنید اکبراور اسد قیصر کی ملاقات

محرم الحرام کے بعد چلائی جانیوالی احتجاجی تحریک کے حوالے سے آگاہی حاصل کی

ہفتہ 5 جولائی 2025 22:19

مظفرآباد(اُردو پوائنٹ اخبارتازہ ترین - این این آئی۔ 05 جولائی2025ء)پاکستان تحریک انصاف کے مرکزی راہنما اپوزیشن لیڈر خواجہ فاروق احمد نے اسلام آباد میں پارٹی کے مرکزی راہنما امجد خان نیازی،کے پی کے پی ٹی آئی کے صدر جنید اکبر،سابق سپیکر قومی اسمبلی اسد قیصر سے ملاقات کی،ا ن ملاقاتوں میں عمران خان کی رہائی کے لیے محرم الحرام کے بعد چلائی جانے والی احتجاجی تحریک کے حوالے سے آگاہی حاصل کی اور آزادکشمیر کی مجموعی سیاسی صورتحال ،آمدہ الیکشن پر بھی مشاورت کی۔

خواجہ فاروق احمد نے محترمہ حلیمہ خان سے بھی راولپنڈی خصوصی عدالت میں ان کی پیشی کے موقع پر ملاقات کی اور انہیں بھی تحریک کے حوالے سے آزادکشمیر پارٹی کی جانب سے ہر ممکن تعاون اور ہر سطح پر شرکت کا یقین دلایا۔

(جاری ہے)

خواجہ فاروق احمد نے پارٹی کی مرکزی قیادت سے توقع ظاہر کی وہ آزادکشمیر کے آمدہ انتخابات کے پیش نظر آزادکشمیر پارٹی کے معاملات پر بھی توجہ دیں گے تاکہ پی ٹی آئی بھرپور طریقہ سے آمدہ الیکشن میں حصہ لے سکے۔

آج کل سیاست کے بازار میں جو منڈی لگی ہوئی ہے ،آمدہ انتخابات میں خرید کرنے والوں اور فروخت ہونے والے دونوں کو عوام ایسا سبق سکھائیں گے کہ آئند ہ الیکشن کے قریب جو سیاسی منڈیاں لگتی ہیں یہ ہمیشہ ہمیشہ کے لیے بند ہوجائیں گی،پی ٹی آئی کے ٹکٹ پر جو الیکشن جیتے تھے اب وہ دوسری پارٹیوں میں شامل ہورہے ہیںان کے حوالے سے بھی آئندہ 3سے 4 دنوں میں عدالتی اور جو بھی فورم ہیں سے رجوع کیا جائے گا تاکہ یہ سیاسی منڈیاں لگانے والوں کو سبق سکھایا جاسکے۔

خواجہ فاروق احمد نے کہا کہ آزادکشمیر کے پی ٹی آئی کے کارکن عمران خان کی رہائی کے لیے جب بھی کال دی جائے گی تو بھرپور شرکت کی جائے گی،خواجہ فاروق احمد کے ساتھ جنید اکبر اعوان،عباس بٹ،خواجہ شہزاد امیدواران اسمبلی بھی شامل تھے۔