ڈپٹی کمشنر کا کنٹرول روم کا دورہ، 10 محرم کے حوالے سے انتظامات کا جائزہ لیا

ہفتہ 5 جولائی 2025 23:06

سرگودھا (اُردو پوائنٹ اخبارتازہ ترین - اے پی پی۔ 05 جولائی2025ء) ڈپٹی کمشنر سرگودھا کیپٹن (ر) محمد وسیم نے محرم الحرام کے سلسلے میں ضلع بھر میں امن و امان کی فضاء برقرار رکھنے اور سیکیورٹی امور کی مؤثر نگرانی کے لئے قائم کئے گئے کنٹرول روم کا دورہ کیا۔ ڈپٹی کمشنر آفس میں قائم اس جدید کنٹرول روم میں محرم کے جلوسوں، مجالس اور حساس مقامات کی براہ راست مانیٹرنگ کی جا رہی ہے۔

ڈپٹی کمشنر نے کنٹرول روم میں نصب سی سی ٹی وی کیمروں،مانیٹرنگ سسٹمز اور عملے کی کارکردگی کا تفصیلی جائزہ لیا۔

(جاری ہے)

انہوں نے بتایا کہ کنٹرول روم کو جدید ٹیکنالوجی سے آراستہ کیا گیا ہے تاکہ عاشورہ کے دوران سکیورٹی اور ٹریفک کے نظام پر ہمہ وقت نظر رکھی جا سکے۔ڈپٹی کمشنر نے کہا کہ محرم کے دوران ضلعی انتظامیہ پولیس، پاک فوج، رینجرز اور دیگر سکیورٹی ادارے مکمل طور پر الرٹ ہیں۔

انہوں نے کہا کہ تمام جلوسوں اور مجالس کی لائیو مانیٹرنگ کی جا رہی ہے اور کنٹرول روم کا عملہ24 گھنٹے ڈیوٹی پر موجود ہے تاکہ کسی بھی ہنگامی صورت حال میں فوری کارروائی عمل میں لائی جا سکے۔ ڈی سی نے موقع پر موجود عملے کو ہدایت کی کہ وہ الرٹ رہیں، کسی بھی مشکوک سرگرمی پر فوری کارروائی کریں اور متعلقہ اداروں سے رابطہ رکھیں۔