وزیراعظم شہباز شریف کا دیہی ترقی کے عالمی دن کے موقع پردیہی فلاح و بہبود کے پختہ عزم کا اعادہ

اتوار 6 جولائی 2025 01:30

لاہور (اُردو پوائنٹ اخبارتازہ ترین - اے پی پی۔ 06 جولائی2025ء) وزیراعظم محمد شہباز شریف نے پاکستان کی دیہی آبادی کی فلاح و بہبود اور ملک کی ترقی کے سفر میں ان کی شمولیت کو یقینی بنانے کے پختہ عزم کا اعادہ کیا ہے۔وزیراعظم آفس کے پریس ونگ سے جاری بیان کے مطابق وزیراعظم محمد شہباز شریف نے دیہی ترقی کے عالمی دن کے موقع پر اپنے پیغام میں کہا کہ آج ہم پوری دنیا کے ساتھ مل کر دیہی آبادی کی ترقی کا عالمی دن منا رہے ہیں ، آج کے دن ہم ملکی ترقی میں اپنی دیہی آبادی کی شراکت کو تسلیم کرتے ہیں اور دیہی علاقوں کی فلاح و بہبود کے لیے اپنے عزم کا اعادہ کرتے ہیں۔

انہوں نے کہا کہ پاکستان کی تقریباً دو تہائی آبادی دیہات میں رہتی ہے جو کہ کھیتی باڑی سے منسلک ہے ، دیہات میں رہنے والے افراد ابھی تک تعاون اور رواداری کی ہماری صدیوں پرانی روایات کو برقرار رکھے ہوئے ہیں، انہی کھیتوں، باغات اور چھوٹے شہروں اور دیہات میں ہی پاکستان کی روح حقیقی معنوں میں پروان چڑھ رہی ہے۔

(جاری ہے)

وزیراعظم نے کہا کہ ہماری حکومت دیہی ترقی کو قومی ترقی کے کلیدی ستون کے طور پر ترجیح دے رہی ہے۔

پائیدار ترقی کے اہداف کے مطابق ہم زراعت، تعلیم، صحت کی دیکھ بھال، انفراسٹرکچر، ہنر کی تربیت اور ماحولیاتی پائیداری کے اہداف، سرمایہ کاری کے ذریعے دیہی معاش کو تبدیل کرنے پر توجہ مرکوز کر رہے ہیں، دیہی سڑکوں کے نیٹ ورک کو وسعت دینے اور پانی اور صفائی کی رسائی کو بہتر بنانے، خواتین کو بااختیار بنانے اور موسمیاتی اسمارٹ فارمنگ کے طریقوں کو فروغ دینے سے اہم پیش رفت ہوئی ہے، یہ کوششیں اس بات کو یقینی بنانے کے ہمارے عزم کی عکاسی کرتی ہیں کہ حکومت دیہی علاقوں کی ترقی کو کس قدر اہمیت دیتی ہے۔

انہوں نے مزید کہا کہ آج کے دن، ہم اپنے دیہی علاقوں کے رہائشیوں کی ترقی کے لیے اپنے عہد کی تجدید کرتے ہیں، ہم اس عزم کا اعادہ کرتے ہیں کہ ایک مضبوط، زیادہ مساوی اور خوشحال پاکستان کی تشکیل میں برابر کے شراکت دار کے طور پر دیہی علاقوں کی ترقی و خوشحالی ہماری اولین ترجیح رہے گی۔