محرم الحرام میں حکومت کا امن و امان برقرار رکھنا قابل تعریف ہے،جمیل احمد سومرو

اتوار 6 جولائی 2025 22:50

لاڑکانہ (اُردو پوائنٹ اخبارتازہ ترین - اے پی پی۔ 06 جولائی2025ء) رکن صوبائی اسمبلی جمیل احمد سومرو، ایم پی اے سہیل انور سیال اور کمشنر لاڑکانہ ڈویژن طاہر حسین سانگی نے کہا ہے کہ سندھ حکومت نے امن و امان برقرار رکھنے کے لیے بہترین انتظامات کیے ہیں۔ان خیالات کا اظہار انہوں نے لاڑکانہ شہر کے مختلف علاقوں میں امام بارگاہوں، ماتمی جلوسوں، سکیورٹی انتظامات اور صفائی ستھرائی کے حوالے سے گفتگو کرتے ہوئے کیا۔

انہوں نے مزید کہا کہ ہم شہدائے کربلا کی قربانی کو یاد کر رہے ہیں جنہوں نے اپنی جانوں کا نذرانہ پیش کر کے یہ سبق دیا کہ کتنی ہی مشکلات آئیں ہمیں حق کا ساتھ دینا چاہیے اور صبر کا دامن ہاتھ سے نہیں چھوڑنا چاہیے۔ ان کا مزید کہنا تھا کہ ہم سب مسلمان ہیں، ہمیں حضرت امام حسین علیہ السلام کے دیے گئے سبق کو یاد رکھنا چاہیے اور آپس میں اتحاد اور بھائی چارہ قائم کرنا چاہیے اور ایک دوسرے کا احترام کرنا چاہیے اور کسی کو تکلیف نہیں دینا چاہیے کیونکہ اسلام ہمیں رواداری اور احترام کا سبق دیتا ہے۔

(جاری ہے)

وزیر اعلیٰ سندھ کے معاون خصوصی خیر محمد شیخ نے کہا کہ محرم کا مہینہ ہمیں صبر کا سبق دیتا ہے کیونکہ شہدائے کربلا کی قربانی ہمارے لیے مشعل راہ ہے اور ہمیں آپس میں اتحاد اور بھائی چارہ قائم کرنا چاہیے۔ اس موقع پر ڈی آئی جی لاڑکانہ، ایس ایس پی لاڑکانہ نے کہا کہ جلوسوں کی نگرانی کے لیے سی سی ٹی وی کیمرے بھی نصب کیے گئے ہیں اور سیکیورٹی کے انتظامات کے لیے پولیس اور رینجرز کی ٹیمیں بھی ڈیوٹی پر موجود ہیں۔

اس موقع پر ڈپٹی کمشنر لاڑکانہ ڈاکٹر شرجیل نور چنہ نے کہا کہ ضلعی انتظامیہ نے بہترین انتظامات کیے ہیں۔ ہم سب ساتھ ہیں اور میری بھی اپیل ہے کہ لاڑکانہ امن کا شہر ہے۔ جسے پرامن بنایا جائے۔ اس موقع پر چیئرمین ضلع کونسل لاڑکانہ اعجاز احمد لغاری، میئر میونسپل کارپوریشن ایڈووکیٹ انور علی لہر اور پیپلز پارٹی کے رہنما اور کارکنان موجود تھے۔