اس اسمبلی کا کوئی فائدہ نہیں جہاں آواز نہ اٹھائی جا سکے. ملک احمد خان بھچر

نااہلی ریفرنس کا اقدام پنجاب کی سیاسی تاریخ پر سیاہ دھبہ ہے، نعرے بازی دونوں طرف سے ہوئی، اسپیکر پنجاب اسمبلی ریفرنس واپس لیں، ورنہ ہم احتجاج اسمبلی کے اندر بھی کریں گے اور باہر بھی، غیر آئینی اقدام کے خلاف عدالت سے بھی رجوع کریں گے. اپوزیشن لیڈر پنجاب اسمبلی کی گفتگو

میاں محمد ندیم منگل 8 جولائی 2025 15:51

اس اسمبلی کا کوئی فائدہ نہیں جہاں آواز نہ اٹھائی جا سکے. ملک احمد خان ..

لاہور(اردوپوائنٹ اخبارتازہ ترین-انٹرنیشنل پریس ایجنسی۔08 جولائی ۔2025 )پنجاب اسمبلی میں اپوزیشن لیڈر ملک احمد خان بھچر نے ایوان میں پی ٹی آئی ارکان کے خلاف نااہلی ریفرنس کو ذاتی انا اور سیاسی خوشنودی کا نتیجہ قرار د یتے ہوئے کہا ہے کہ اسمبلی میں آواز دبانے کی کوشش کی جا رہی ہے اور یہ اقدام پنجاب کی سیاسی تاریخ پر سیاہ دھبہ ہے. انہوں نے کہا کہ پنجاب اسمبلی میں ہونے والے حالیہ واقعات کو جمہوری عمل پر حملہ ہے ان کا کہنا تھا کہ نعرے بازی دونوں طرف سے ہوئی، مگر ہمارے خلاف نااہلی کا ریفرنس ذاتی انا اور کسی کی خوشنودی کا نتیجہ لگتا ہے انہوں نے کہا کہ پنجاب میں اربوں روپے کی تشہیری مہم جاری ہے اور جب ہم وزیراعلی مریم نواز کے خلاف احتجاج کرتے ہیں تو ہمیں سزا دی جاتی ہے.

(جاری ہے)

ملک احمد بھچر کا کہنا تھا کہ ہم پر مائیک اور کرسیاں توڑنے کا غلط الزام لگا کر 26 ارکان کو معطل کر دیا گیا حالانکہ ہم پرامن احتجاج کر رہے تھے ان کا کہنا تھا کہ یہ ریفرنس پنجاب کی تاریخ پر سیاہ دھبہ ہے اور یہ روایت کل ان کے لیے بھی نقصان دہ ثابت ہو سکتی ہے جب وہ اپوزیشن میں ہوں گے. انہوں نے کہا کہ 26ویں آئینی ترمیم بھی ذاتی مفادات کے لیے کی گئی ہمیں اپنے بانی قائد سے ملاقات کی اجازت نہیں دی جا رہی اور اسپیکر کی ناراضگی بھی اندرونی دباﺅ کا نتیجہ ہے احمد خان بھچر نے مطالبہ کیا کہ اسپیکر پنجاب اسمبلی ریفرنس واپس لیں ورنہ ہم احتجاج اسمبلی کے اندر بھی کریں گے اور باہر بھی، ساتھ ہی ساتھ اس غیر آئینی اقدام کے خلاف عدالت سے بھی رجوع کریں گے.