Live Updates

صدرزرداری کے خلاف سوشل میڈیا پر چلنے والی قیاس آرائیوں میں کوئی حقیقت نہیں، نیئرحسین بخاری

منگل 8 جولائی 2025 19:33

اسلام آبا د(اُردو پوائنٹ اخبارتازہ ترین - این این آئی۔ 08 جولائی2025ء)سیکرٹری جنرل پیپلز پارٹی پارلیمنٹرینز سید نیئر حسین بخاری نے کہاہے کہ صدرمملکت آصف زرداری کے خلاف سوشل میڈیا پر چلنے والی قیاس آرائیوں میں کوئی حقیقت نہیں۔ اپنے بیان میں نیئر حسین بخاری نے کہاکہ قیاس آرائیاں کرنے والوں کو آئین اور قانون کی سمجھ ہی نہیں، صدر آصف زرداری اس ملک کے منتخب صدر ہیں، آصف زرداری کے بغیر یہ سسٹم نہیں چل سکتا۔

نیئر حسین بخاری نے کہاکہ پیپلز پارٹی کی حمایت کے بغیر تو حکومت بھی نہیں چل سکتی، قیاس آرائیاں کرنے والے ملک کو غیرمستحکم کرنا چاہتے ہیں۔ انہوںنے کہاکہ پیپلز پارٹی کو مائنس کرنے کے بعد قومی اسمبلی میں کوئی حکومت بن سکتی ہے نہ چل سکتی ہے، اسمبلی ارکان کے پاس آئین میں وزیراعظم یا کسی وزیراعلی کو ہٹانے کا حق موجود ہے۔

(جاری ہے)

انہوںنے کہاکہ اگر وزیراعظم یا کوئی وزیراعلی آئین کے مطابق ڈیلیور نہیں کررہا تو اپوزیشن اور حکومتی بنچوں پر بیٹھے ارکان کے پاس ان کو ہٹانے کا آئینی طریقہ کارموجود ہے۔

انہوںنے کہاکہ کسی وزیراعلی کو عدم اعتماد کی تحریک سے ہٹانے سے نظام غیرمستحکم نہیں ہوتا، کسی کو غیرآئینی طریقے سے ہٹانے یا احتجاجی حکمت عملی نظام غیرمستحکم ہوتا ہے۔ انہوںنے کہاکہ عدم اعتماد کی تحریک سے اگر عدم استحکام آتا تو آئین میں شق موجود نہ ہوتی، پیپلز پارٹی وفاقی کابینہ میں شامل نہیں ہورہی۔انہوںنے کہاکہ ہم نے بجٹ میں ن لیگ کی حمایت کرکے یقینی بنایا کہ نظام اور پارلیمان چلتی رہے، پی ٹی آئی مذاکرات اور ڈائیلاگ پر یقین ہی نہیں رکھتی۔ انہوںنے کہاکہ پی ٹی آئی تحریک چلانے کا اپنا شوق پورا کرلے۔