برہان وانی تحریک آزادی کشمیر اور مزاحمت کی علامت ہیں،پیر محمد مظہر سعید شاہ

منگل 8 جولائی 2025 23:49

اسلام آباد (اُردو پوائنٹ اخبارتازہ ترین - این این آئی۔ 08 جولائی2025ء)وزیر اطلاعات آزاد حکومت ریاست جموں و کشمیر پیر محمد مظہر سعید شاہ نے کہا ہے کہ برہان وانی تحریک آزادی کشمیر اور مزاحمت کی علامت ہیں۔ برہان وانی صرف ایک مجاہد نہیں ایک نظریہ ہے۔ کشمیر کا ہر جوان برہان وانی ہے۔ ان خیالات کا اظہار انہوں نے تحریک آزادی کشمیر کے نوجوان رہنما تحریک مزاحمت کے سرخیل برہان مظفر وانی کی برسی کے موقع پر اپنے خصوصی بیان میں کیا۔

وزیر اطلاعات پیر محمد مظہر سعید شاہ نے کہا کہ خوش قسمت ہے وہ ماں جس نے برہان وانی جیسے عظیم سرخیل کو جنم دیا۔برہان وانی اپنے خون سے ایک طرف تحریک آزادی کشمیر کو ایک نئی طاقت اور جلا بخش گئے اور دوسری طرف عالمی سطح پر بھارتی حکومت کابھیانک،مکروہ،سیاہ اور قبیح چہرہ بھی عیاں کر گئے۔

(جاری ہے)

برہان مظفر وانی نے نے شعور جگایا، وہ نہ جھکا، نہ رکا، نہ بکا، ظلم کے ہر وار پر اس کی مسکراہٹ اور عزم صمیم ہی جواب تھا۔

پیر محمد مظہر سعید شاہ نے کہا کہ بھارتی فوج کے ظلم و ستم سے تنگ آ کر برہان مظفر وانی نے صرف 15 برس کی عمر میں قلم چھوڑ کر جہاد شروع کیا اور اپنی شہادت سے تحریک آزادی کشمیر میں نئی روح پھونکی دی، اپنے حصے کی شمع جلا کر جامِ شہادت نوش کیا۔وہ اپنی کمٹمنٹ کی وجہ سے تحریک آزادی کے عظیم مجاہد بن گئے۔ برہان وانی نے سوشل میڈیا کے ذریعے آزادی کے پیغام کو گھر گھر پہنچایا۔انہوں نے کہا کہ برہان وانی شہید کی والدہ محترمہ اور والد محترم کو سلام پیش کرتا ہوں۔انہوں نے کہا کہ برہان وانی شہید کے بھائیوں،بہنوں اور شہید حریت پسندوں کو بھی خراج عقیدت پیش کرتا ہوں۔