گورنربلوچستان نےضلع پشین میں باضابطہ طور پر انسدا پولیو مہم کا آغاز کر دیا

جمعرات 10 جولائی 2025 13:50

کوئٹہ (اُردو پوائنٹ اخبارتازہ ترین - اے پی پی۔ 10 جولائی2025ء) گورنر بلوچستان جعفر خان مندوخیل نے کہا ہے کہ ہم تمام چیلنجز کے باوجود پولیو وائرس کے خاتمے کے لئے پرعزم ہیں،اپنی آئندہ نسلوں کو زندگی بھر کی معذوری سے بچانا ہمارا قومی فریضہ ہے۔ انہوں نے یہاں پشین ریسٹ ہاؤس میں بچے کو پولیو سے بچائو کے قطرے پلاکر مہم کا آغاز کرتے ہوئے کہا کہ پولیو جیسی مہلک بیماری کا خاتمہ اگرچہ مشکل کام ہے لیکن ناممکن ہرگز نہیں۔

گورنر بلوچستان نے صوبے میں انسداد پولیو مہم کی سو فیصد کامیابی کو یقینی بنانے کے لئے جدید اور تخلیقی زاویے سے کام کرنے کی ضرورت پر زور دیتے ہوئے کہا کہ ملک سے پولیو کے وائرس کا خاتمہ ہمارا قومی فریضہ اور ذمہ داری بھی ہے جس کے لئے ایک نئے عزم کے ساتھ سنجیدہ اقدامات کرنے کی ضرورت ہے جس کے لئے حکومت تمام وسائل بروئے کار لا رہی ہے ۔

(جاری ہے)

انہوں نے والدین سے اپیل کی کہ وہ پولیو ورکرز کے ساتھ تعاون یقینی بنائیں تاکہ ہمارے بچے اس موذی مرض سے محفوظ رہیں، انہوں نے کہا کہ ہمارے بہادر فرنٹ لائن ورکرز بچوں تک ویکسین کی رسائی ممکن بنا رہے ہیں اور اس کے لئے یہ بھی ضروری ہے کہ والدین ہر مہم میں اپنے بچوں کو پولیو سے بچاؤ کے قطرے ضرور پلوائیں، انہوں نے کہا کہ جب تک پولیو وائرس کا مکمل خاتمہ نہیں ہو جاتا تب تک بچوں کی معذوری کا خطرہ موجود رہے گا۔

گورنر بلوچستان نے محکمہ صحت کے حکام کو پولیو مہم کی مکمل نگرانی اور انکاری والدین کو آگاہی فراہم کی ہدایت کرتے ہوئے کہا کہ علما کرام اور قبائلی عمائدین کے تعاون سے مقامی انتظامیہ کو انسداد پولیو مہم میں اپنا کردار ادا کرنا ہوگا اور صوبے کو پولیو سے پاک کرنا ہوگا۔اس موقع پر وزیر مواصلات بلوچستان میر سلیم احمد کھوسہ، صوبائی وزیر تعلیم راحیلہ حمید خان درانی، صوبائی وزیر خزانہ میرشعیب نوشیروانی،صوبائی وزیر میر عاصم کرد گیلو، ، ڈپٹی کمشنر پشین زاہد خان خلجی، کمیونیکیشن آفیسر اصغرخان، ڈی جی ہیلتھ امین مندوخیل اور دیگر حکام بھی موجود تھے۔