یوکرین کے لئے نامزد سفیر میجر جنرل (ر) کنور عدنان احمد خان کا اسلام آباد چیمبر آف کامرس اینڈ انڈسٹری کا دورہ، پاکستان اور یوکرین کے درمیان تجارت اور اقتصادی تعاون بڑھانے پر بات چیت

اسلام آباد (اُردو پوائنٹ اخبارتازہ ترین - اے پی پی۔ 10 جولائی2025ء) یوکرین کے لئے نامزد سفیر میجر جنرل (ر) کنور عدنان احمد خان نے اسلام آباد چیمبر آف کامرس اینڈ انڈسٹری (آئی سی سی آئی) کا دورہ کیا اور آئی سی سی آئی کے صدر ناصر منصور قریشی اور تاجر برادری کے اراکین کے ساتھ دونوں ممالک کے درمیان باہمی تجارت اور اقتصادی تعاون کو بڑھانے کے لیے ملاقات کی۔

بات چیت کے دوران سفیر کنور عدنان نے اس بات پر زور دیا کہ موجودہ عالمی چیلنجوں کے باوجود یوکرین پاکستانی برآمد کنندگان کے لیے خاص طور پر ٹیکسٹائل، فارماسیوٹیکل، انفارمیشن ٹیکنالوجی اور زراعت جیسے شعبوں میں تعاون بڑھانے کے لئے نمایاں اہمیت رکھتا ہے۔ انہوں نے دونوں ممالک کے نجی شعبوں کے درمیان پل کے طور پر کام کرنے اور موثر تجارتی شراکت داری کو آسان بنانے کے لیے اپنے پختہ عزم کا اظہار کیا۔

(جاری ہے)

نامزد سفیر نے پاکستان کی اقتصادی سفارت کاری کو آگے بڑھانے میں آئی سی سی آئی کے فعال کردار کو سراہا اور تاجروں کے لیے تجارتی رکاوٹوں کو دور کرنے میں اپنے مکمل تعاون کا یقین دلایا۔ انہوں نے تجارتی وفود کے انعقاد، ورچوئل بی ٹو بی مصروفیات اور آئی سی سی آئی اور یوکرینی چیمبرز آف کامرس کے درمیان ادارہ جاتی روابط قائم کرنے کی تجاویز کا خیرمقدم کیا۔

انہوں نے تعمیرات اور طبی شعبوں کو پاکستانی سرمایہ کاروں کے لیے امید افزاء شعبے قرار دیا اور یوکرین میں ہنر مند پاکستانی لیبر کے لیے وسیع تر گنجائش کو اجاگر کیا۔نامزد سفیر کا خیرمقدم کرتے ہوئے آئی سی سی آئی کے صدر ناصر منصور قریشی نے کہا کہ پاکستان اور یوکرین کے درمیان خوشگوار سفارتی تعلقات ہیں لیکن دو طرفہ تجارت کی موجودہ سطح اپنی حقیقی صلاحیت سے بہت کم ہے۔

انہوں نے تجارت کو غیر روایتی شعبوں جیسے کہ انفارمیشن ٹیکنالوجی، قابل تجدید توانائی، انجینئرنگ کے سامان اور اعلیٰ تعلیمی خدمات میں متنوع بنانے کی اہمیت پر زور دیا۔صدر ناصر منصور قریشی نے تجارتی تعلقات کو گہرا کرنے کے لیے مشترکہ منصوبوں، تجارتی اور ثقافتی تبادلوں اور ٹیکنالوجی کی منتقلی کو فروغ دینے کی تجاویز پیش کیں۔ انہوں نے یوکرینی ہم منصبوں کے ساتھ مشغولیت کے لیے کاروباری برادری کو متحرک کرنے کے لیے آئی سی سی آئی کی جانب سے مکمل تعاون کا یقین دلایا۔

آئی سی سی آئی کے سابق صدر میاں اکرم فرید نے کاروباری برادری کی طرف سے قومی اقتصادی ترقی میں معاونت کے عزم کا اعادہ کیا۔ آئی سی سی آئی کے ایک اور سابق صدر میاں شوکت مسعود نے یوکرین کو "مواقع کی سرزمین" قرار دیا اور کاروباری شعبے پر زور دیا کہ وہ قومی مفاد میں ان امکانات سے فائدہ اٹھائیں۔اپنے اظہار تشکر میں آئی سی سی آئی کے نائب صدر ناصر محمود چوہدری نے نامزد سفیر کو پاکستان یوکرین تجارتی تعلقات کو فروغ دینے میں آئی سی سی آئی کے مکمل تعاون کا یقین دلایا۔

میٹنگ کا اختتام دونوں ملکوں کی باہمی خوشحالی، کاروباری روابط کو مضبوط بنانے اور تعاون کے مشترکہ عزم کے ساتھ ہوا۔ اس موقع پر نمایاں شرکا میں ایگزیکٹو ممبران ملک محسن خالد، روحیل انور بٹ اور عرفان چوہدری شامل تھے۔