وزارت مذہبی امور کا ایران، عراق اور شام جانے والے زائرین کے حوالہ سے سالار نظام ختم کرکے زیارات گروپ آرگنائزرز سسٹم متحرک کرنے کا فیصلہ

جمعرات 10 جولائی 2025 22:40

اسلام آباد (اُردو پوائنٹ اخبارتازہ ترین - اے پی پی۔ 10 جولائی2025ء) وزارت مذہبی امور نے ایران، عراق اور شام جانے والے زائرین کے حوالہ سے سالار نظام کو ختم کرکے اس کی جگہ زیارات گروپ آرگنائزرز سسٹم کو متحرک کرنے کا فیصلہ کیا ہے۔ وزارت مذہبی امور کے مطابق وفاقی حکومت نے زائرین کے حوالے سے 2021ء میں یہ پالیسی متعارف کرائی تھی جس پر اب تیزی سے عملدرآمد کا فیصلہ کر لیا گیا ہے۔

حج اور عمرہ کی طرح اب زیارات مقدسہ کے لئے بھی وزارت مذہبی امور میں رجسٹریشن کرانا لازمی ہوگی۔ 2021ء میں بھی زیارات گروپ آرگنائزرز سے درخواستیں طلب کی گئی تھیں۔

(جاری ہے)

اب تک 585 کمپنیز نے اپنی دستاویزات اور کوائف مکمل کئے۔ ترجمان مذہبی امور کا کہنا ہے کہ زیارات گروپس کی رجسٹریشن کے لئے وزارت مذہبی امور نے ایک اور موقع فراہم کیا ہے۔ گروپ یا کمپنی کی رجسٹریشن کے لئے کردار، مالی شفافیت کے ساتھ میزبان ملک میں بلیک لسٹ نہ ہونا لازم ہوگا۔

زیارات گروپ آپریٹر کے طور پر کام کا تجربہ، دستاویزی ثبوت، آڈٹ یا مالیاتی بینک کی رپورٹ بھی لازمی ہوگی۔ نئی کمپنی 10 اگست 2025ء سے قبل درخواستیں جمع کرانے کی پابند ہوں گی۔ ترجمان کا کہنا ہے کہ نجف و کربلا، مشہد و قم، کاظمین و دمشق کے زائرین کی مشکلات کے پیش نظر یہ اقدام اٹھایا گیا ہے۔