بلال اظہر کیانی کی قیادت میں پاکستانی وفد کی یو اے ای کے سینئر حکام کے ساتھ ملاقاتیں

ابوظہبی (اُردو پوائنٹ اخبارتازہ ترین - اے پی پی۔ 10 جولائی2025ء) وزیر مملکت برائے خزانہ و ریلویز اور وزیر اعظم کے ڈیلیوری یونٹ کے سربراہ بلال اظہر کیانی کی قیادت میں اعلیٰ سطح کے وفد نے متحدہ عرب امارات (یو اے ای) حکومت کے ایکسپیرینس ایکسچینج پروگرام (ای ای پی) کے تحت متحدہ عرب امارات کا سرکاری دورہ کیا۔یہ دورہ وزیراعظم محمد شہباز شریف کے ادارہ جاتی اصلاحات اور پبلک سیکٹر گورننس کو جدید بنانے کے وژن سے ہم آہنگ ہے۔

ابو ظہبی میں پاکستانی سفارتخانہ کی جانب سے جمعرات کو یہاں موصولہ اعلامیہ کے مطابق بلال اظہر کیانی نے ڈیجیٹل گورننس، پبلک سروس ڈیلیوری اور ٹیکس سسٹم کی جدت کے شعبوں میں تجربات کے تبادلہ کیلئے سہولت فراہم کرنے پر متحدہ عرب امارات کی حکومت سے اظہار تشکر کیا۔

(جاری ہے)

انہوں نے متحدہ عرب امارات کے طرز حکمرانی اور جدت طرازی کے ماڈلز سے سیکھنے کی اہمیت کو بھی اجاگر کیا۔

دورے کے آخری روز پاکستانی وفد نے متحدہ عرب امارات کے سینئر حکام کے ساتھ تفصیلی ملاقاتیں کیں جن میں منیجنگ ڈائریکٹر، ورلڈ گورنمنٹس سمٹ اور ڈائریکٹر، گورنمنٹ لیڈرز اور ٹیلنٹ ڈیپارٹمنٹ محمد الشرحان، ڈائریکٹر جنرل فیڈرل ٹیکس اتھارٹی خالد علی البستانی، یو اے ای گورنمنٹ میڈیا آفس کے چیئر پرسن سعید الطیر، سیکرٹری جنرل دی ڈیجیٹل سکول ڈاکٹر ولید العلی، سی ای او دبئی فیوچر فائونڈیشن خلفان بیلہول اور ایگزیکٹو ڈائریکٹوریٹ آف گورنمنٹ پرفارمنس اینڈ ایکسی لینس کے حکام نے قیادت کی ترقی، ڈیجیٹل تبدیلی، مستقبل کی دور اندیشی اور گورننس میں میڈیا مواصلات کے حوالہ سے متحدہ عرب امارات کے سٹریٹجک نقطہ نظر کے بارے میں بصیرت فراہم کی۔

بلال اظہر کیانی نے خدمات کی فراہمی اور ادارہ جاتی کارکردگی کو بڑھانے کے لیے ڈیجیٹل گورننس، کارکردگی اور پبلک سیکٹر کی مسابقت میں عالمی بہترین طریقوں کو اپنانے کے لیے پاکستان کے عزم کو اجاگر کیا۔ بلال اظہر کیانی کی قیادت میں آٹھ رکنی اعلی سطح کے حکومتی وفد میں قومی اسمبلی کے رکن علی زاہد، چیف کوآرڈینیٹر گورنمنٹ پرفارمنس اینڈ انوویشن پرائم منسٹر آفس مشرف زیدی، ضرار ہاشم خان سیکرٹری آئی ٹی اینڈ ٹیلی کام اور وزیراعظم آفس کے دیگر سینئر حکام بھی شامل تھے۔

یہ اعلیٰ سطح کی مصروفیت 16 جون 2025ء کو متحدہ عرب امارات کی وزارت برائے کابینہ امور اور پاکستان کی وزارت منصوبہ بندی، ترقی اور خصوصی اقدامات کے درمیان کی جانے والی مفاہمت کی یادداشت (ایم او یو) کا نتیجہ ہے جو گورننس اور ادارہ جاتی تعاون میں عمدہ کارکردگی کے لیے دونوں ممالک کے مشترکہ عزم کو مزید تقویت فراہم کرتی ہے۔