مین مہمند ڈیم پر تعمیراتی کام شروع ہوگیا، پراجیکٹ 2027 میں بجلی کی پیداوار شروع کردے گا

مہمند ڈیم پراجیکٹ سے نیشنل گرڈ کو ہرسال 2 ارب 86 کروڑ یونٹ ماحول دوست بجلی فراہم ہوگی، مہمند ڈیم پشاور، چارسدہ اور نوشہرہ کو سیلاب سے بچائے گا اور پشاور کو یومیہ 300 ملین گیلن پینے کا پانی بھی فراہم کرے گا

ثنااللہ ناگرہ جمعرات 10 جولائی 2025 19:55

مین مہمند ڈیم پر تعمیراتی کام شروع ہوگیا، پراجیکٹ 2027 میں بجلی کی پیداوار ..

لاہور ( اردوپوائنٹ اخبار تازہ ترین۔ آئی پی اے ۔ 10 جولائی 2025ء ) چیئرمین واپڈا نوید اصغر چوہدری نے خیبر پختونخوا کے ضلع مہمند میں دریائے سوات پر زیر تعمیر مہمند ڈیم پراجیکٹ کا دورہ کیا۔ ممبر (واٹر) واپڈا سید علی اختر شاہ بھی ان کے ہمراہ تھے۔ دورے کے دوران چیئرمین نے مختلف سائٹس پر تعمیراتی سرگرمیوں کا جائزہ لیا۔ ان سائٹس میں سپل وے ، پاور ہاوٴس ، مین ڈیم ، ڈائی ورشن سسٹم اور پاور ان ٹیک شامل ہیں ۔

چیئرمین نے اس بات پر اطمینان کا اظہار کیا کہ پراجیکٹ پر ریور ڈائی ورشن ٹنلز، اپ سٹریم اور ڈاوٴن سٹریم عارضی (Coffer) ڈیمز ، ڈیم Plinth، دائیں اور بائیں پشتوں اور ڈیم فاوٴنڈیشن کی کھدائی جیسے اہم اہداف مکمل ہونے کے بعد رواں سال مئی میں مین ڈیم پر تعمیراتی کام شروع ہو گیا ہے۔

(جاری ہے)

جنرل منیجر / پراجیکٹ ڈائریکٹر مہمند ڈیم ہائیڈروپاور پراجیکٹ نے کنسلٹنٹس اور کنٹریکٹرز کے پراجیکٹ منیجرز کے ہمراہ چیئرمین کو تمام سائٹس پر پیش رفت کے حوالے سے بریفنگ دی۔

انہیں بتایا گیا کہ پراجیکٹ کی 14 مختلف سائٹس پر تعمیراتی کام بیک وقت جاری ہے۔ پاور ہاوٴس کی عمارت کی تعمیر شروع ہو گئی ہے۔ الیکٹرومکینیکل آلات کی مینوفیکچرنگ اگلے مراحل میں ہے جبکہ سپل وے پر تعمیراتی کام اپنے مقررہ شیڈول سے آگے ہے۔ مین ڈیم کی تکمیل کے بعد مہمند ڈیم پراجیکٹ سے بجلی کی پیداوار2027 میں شیڈول ہے۔ زرعی مقاصد، سیلاب سے بچاوٴ اور کم لاگت بجلی کے حوالے سے مہمند ڈیم پراجیکٹ کی افادیت کا ذکر کرتے ہوئے چیئرمین نے کنسلٹنٹس اور کنٹریکٹرز کو ہدایت کی کہ پراجیکٹ کی شیڈول کے مطابق تکمیل کیلئے اپنی بھرپور کوششیں کریں۔

213 میٹر بلند مہمند ڈیم دنیا کا پانچواں بڑا سی ایف آر ڈی (Concrete Face Rock Filled) ڈیم ہے۔ پراجیکٹ کی پانی ذخیرہ کرنے کی صلاحیت 1.29 ملین ایکڑ فٹ ہے جس سے مہمند اور چارسدہ کے اضلاع کی 18 ہزار233 ایکڑ نئی اراضی زیر کاشت آئے گی جبکہ منڈہ ہیڈ ورکس سے نکلنے والی لوئر سوات اور دوآبہ کینالز کے کمانڈ ایریا میں ایک لاکھ 60 ہزار ایکڑ موجودہ اراضی کیلئے بھی اضافی پانی دستیاب ہوگا۔ 800 میگاواٹ پیداواری صلاحیت کے مہمند ڈیم پراجیکٹ سے نیشنل گرڈ کو ہر سال 2 ارب 86 کروڑ یونٹ کم لاگت اور ماحول دوست بجلی فراہم ہوگی۔ مہمند ڈیم نہ صرف پشاور، چارسدہ اور نوشہرہ کو سیلاب کے اثرات سے بچاوٴ میں مدد دیگا بلکہ پشاور شہر کو 300 ملین گیلن یومیہ پینے کا پانی بھی فراہم کرے گا۔