سرگئی لاوروف نے یوکرین سے متعلق نیا خیال پیش کیا، صدر ڈونلڈ ٹرمپ سے بات کرونگا، امریکی وزیر خارجہ مارکو روبیو

جمعہ 11 جولائی 2025 09:30

کوالالمپور (اُردو پوائنٹ اخبارتازہ ترین - اے پی پی۔ 11 جولائی2025ء) امریکی وزیر خارجہ مارکو روبیو نے انکشاف کیا ہے کہ انہوں نے اپنے روسی ہم منصب سرگئی لاوروف سے یوکرین میں جنگ کے حل میں پیش رفت نہ ہونے پر اپنی مایوسی اور ناامیدی کا اظہار کیا ہے تاہم انہوں نے کہا کہ ان کے روسی ہم منصب نے یوکرین کے بارے میں ایک نیا خیال پیش کیا ہے جو یوکرین کے ساتھ امن کا راستہ کھول سکتا ہے۔

(جاری ہے)

العربیہ کے مطابق انہوں نے ملائیشیا میں جنوب مشرقی ایشیائی ممالک کی تنظیم (آسیان) کے سربراہی اجلاس کے موقع پر لاوروف سے ملاقات کے بعد صحافیوں سے کہا یہ کوئی نیا طریقہ نہیں ہے۔ یہ ایک نیا خیال یا نیا تصور ہے جو میں صدر ٹرمپ کو بحث کے لیے پیش کروں گا۔ انہوں نے خبردار کیا کہ یہ کوئی ایسی چیز نہیں ہے جو خود بخود امن کا باعث بنے لیکن یہ ایک راستہ کھول سکتی ہے۔واضح رہے دونوں وزراء نے کوالالمپور میں آسیان اجلاس کے موقع پر ملاقات کی ۔ یاد رہے یوکرین میں جنگ بندی کے مذاکرات تعطل کا شکار ہیں۔ یہ ملاقات تقریباً 50 منٹ تک جاری رہی۔