Live Updates

دریا کنارے غیر محفوظ علاقوں سے آبادی کا انخلا یقینی بنایا جائے،متعلقہ ادارے الرٹ رہیں،چیف سیکرٹری پنجاب کی ہدایت

جمعہ 11 جولائی 2025 16:52

لاہور (اُردو پوائنٹ اخبارتازہ ترین - اے پی پی۔ 11 جولائی2025ء) دریائے سندھ میں چشمہ کے مقام پر درمیانے درجے کے سیلاب کے بعد میانوالی، لیہ اور بھکر کےلئے فلڈ وارننگ جاری کر دی گئی ہے۔چیف سیکرٹری پنجاب زاہد اختر زمان نے پی ڈی ایم اے کو ہدایت کی ہے کہ دریا کنارے غیر محفوظ علاقوں سے آبادی کے انخلا کو یقینی بنایا جائے۔انہوں نے یہ ہدایت جمعہ کو یہاں سول سیکرٹریٹ میں ڈپٹی کمشنرز کے ویڈیو لنک اجلاس کے دوران جاری کی جس میں ممکنہ سیلاب اور مون سون بارشوں کے باعث اربن فلڈنگ سے نمٹنے کےلئے انتظامات کا جائزہ لیا گیا۔

چیف سیکرٹری نے کہا کہ عوام کے جان و مال کا تحفظ حکومت کی اولین ذمہ داری ہے،انتظامات کےلئے محکمہ خزانہ نے تمام اضلاع کو درکار فنڈزفراہم کر دیئے ہیں۔

(جاری ہے)

انہوں نے پی ڈی ایم اے کو موسم کی صورتحال،دریاوں اور ڈیموں میں پانی کے بہائو کی مسلسل مانیٹرنگ سے متعلق بھی ہدایات جاری کیں۔چیف سیکرٹری نے کہا کہ محکمہ موسمیات نے مون سون میں معمول سے 20تا 25فیصد زیادہ بارشوں کی پیشگوئی کی ہے،اربن فلڈنگ کے خطرے سے نمٹنے کےلئے محکمہ بلدیات، واسا اور ریسکیو 1122 الرٹ رہیں۔

انہوں نے ہدایت کی کہ دس اضلاع میں نئے قائم ہونے والے واسا کو جلد فعال کیا جائے۔وزیر اعلی پنجاب کی ہدایت کے مطابق تمام اضلاع میں واسا اور پی ایچ اے قائم کئے جائیں گے۔انہوں نے کہا کہ لاہور میں گزشتہ روز شدید بارش کے بعد بر وقت نکاسی آب کے سلسلے میں کمشنر، ڈی سی لاہور اور ان کی ٹیم کی کارکردگی قابل ستائش ہے۔چیف سیکرٹری نے کہا کہ بارشوں کے دوران مخدوش عمارات کے گرنے کا خطرہ بڑھ جاتا ہے، قیمتی انسانی جانوں کے تحفظ کےلئے تمام اضلاع میں مخدوش عمارات کی فوری نشاندہی کی جائے۔

چیف سیکرٹری نے اضلاع میں ٹریفک نظام کی بہتری سے متعلق بھی ہدایات جاری کیں۔ڈی جی پی ڈی ایم اے نے اجلاس کو تفصیلی بریفنگ دی۔ انہوں نے بتایا کہ بارشوں کے باعث حادثات میں 25جون سے اب تک پنجاب میں 39افراد جاں بحق اور 103زخمی ہوئے ہیں،زیادہ اموات خستہ حال عمارتوں، چھتوں کے گرنے کے باعث ہوئیں۔ انہوں نے کہا کہ دریائے سندھ میں چشمہ کے مقام پر درمیانے درجے کے سیلاب کی صورتحال ہے۔