اسلامیہ یونیورسٹی بہاولپور کی دینی اور ملی خدمات کی 100 سالہ تقریبات شایاں نشان انداز میں منائی جائیں گی، وائس چانسلرپروفیسر ڈاکٹر محمد کامران

بہاولپور (اُردو پوائنٹ اخبارتازہ ترین - اے پی پی۔ 11 جولائی2025ء) وائس چانسلر پروفیسر ڈاکٹر محمد کامران نے کہا ہے کہ اسلامیہ یونیورسٹی بہاولپور کی دینی اور ملی خدمات کی 100 سالہ تقریبات شایاں نشان انداز میں منائی جائیں گی۔ اس موقع پر سٹیٹ بنک آف پاکستان 100 روپے مالیت کا یادگاری سکہ جاری کرے گا اور پاکستان پوسٹل سروسز خصوصی یادگاری ڈاک ٹکٹ جاری کرے گا۔

وائس چانسلر نے ان خیالات کا اظہار اسلامیہ یونیورسٹی بہاولپور کی 100 سالہ تقریبات کے لیے بنائی گئی خصوصی کمیٹی اور منتظمین کے اجلاس کی صدارت کرتے ہوئے کیا۔ اجلاس میں ڈینز، پرنسپل آفیسر، شعبہ جات کے سربراہان، فیکلٹی ممبران اور افسران شریک ہوئے۔ ان تقریبات کے لیے قائم کی گئی کمیٹی کے سیکرٹری ڈاکٹر شہزا د احمد خالد نے یکم اگست 2025 سے جون 2026 تک منعقد ہونے والی تقریبات کی تفصیل بیان کی۔

(جاری ہے)

بریفنگ میں بتایا گیا کہ اسلامیہ یونیورسٹی بہاولپور کی صد سالہ تقریبات کا لوگو اور سلوگن ’’ماضی کی شان،مستقبل کی امید، 100 سالہ تعلیمی میراث‘‘ جاری کر دیا گیا ہے۔ یکم اگست کو عباسیہ کیمپس میں منعقد ہونے والی تقریب میں بانی جامعہ عباسیہ سر صادق محمد خان عباسی پنجم اور اولین شیخ الجامعہ مولانا غلام محمد گھوٹوی کو خراج تحسین پیش کیا جائے گا۔

اس موقع پر منعقدہ تقریب میں خاندان عباسیہ کے افراد، پارلیمنٹرینز، سرکاری حکام، معززین شہر، سول سوسائٹی، اساتذہ اور طلباو طالبات شریک ہوں گے۔ وائس چانسلر نے کہا کہ عباسیہ کیمپس کے مرکزی دروازے کوصد سالہ تقریبات سے منسوب کیا جائے گا،100 درختوں پر مشتمل باغ کی شجرکاری ہو گی اور ان کو جامعہ کی 100 نامور شخصیات کے نام سے منسوب کیا جائے گا۔

انہوں نے کہا کہ جامعہ کا ترانہ بھی مرتب کیا جائے گا، نومبر کے مہینے میں جامعہ کا صد سالہ کانووکیشن اور ایلومنائی کی عظیم و شان تقریب منعقد ہو گی۔ اس سال طلباو طالبات کی تعارفی تقریب میں حلف لینے کی خصوصی روایت کا آغاز بھی کیا جائے گا۔ خصوصی ایونٹس میں کانفرنسز، سیمینار، کتاب میلہ، ریسرچ ایکسپو، سو سالہ ایوارڈز، جاب فیئر، پھولوں کی نمائش اور دیگر تقریبات شامل ہیں۔