ڈیرہ مراد جمالی کے لئے اڑھائی ارب روپے کے ترقیاتی منصوبوں کی منظوری دی گئی ہے،صوبائی وزیرمیر محمد صادق عمرانی

جمعہ 11 جولائی 2025 23:20

کوئٹہ (اُردو پوائنٹ اخبارتازہ ترین - اے پی پی۔ 11 جولائی2025ء) پاکستان پیپلز پارٹی کی سینٹرل ایگزیکٹو کمیٹی کے رکن اور صوبائی وزیر آبپاشی میر محمد صادق عمرانی نے کہا ہے کہ ڈیرہ مراد جمالی کو جدید سہولیات سے آراستہ ماڈرن سٹی بنانے کے لیے پہلے مرحلے میں اڑھائی ارب روپے کے ترقیاتی منصو بوں کی منظوری دے دی گئی ہے۔ پہلا مرحلہ کا آغاز شرقی ڈیرہ مراد جمالی سے ہوگا، جہاں پانی، نکاسی آب اور سڑکوں کے بنیادی مسائل کو ترجیحی بنیادوں پر حل کیا جائے گا، جس میں پینے کے صاف پانی کی نئی لائنوں کی تنصیب، تالابوں کی کشادگی ،سیوریج سسٹم کی فراہمی اور تمام گلیوں کی پختگی جیسےترقیاتی اقدامات شامل ہیں۔

ان تمام کاموں کے لیے ڈرون کے ذریعہ جدید اسسمنٹ مکمل کر لی گئی ہے تاکہ منصوبہ بندی میں شفافیت اور درستگی کو یقینی بنایا جا سکے، ان خیالات کا اظہار انہوں نے ڈیرہ مراد جمالی سے آئے ہوئے مختلف وفود اور میڈیا نمائندوں سے گفتگو کرتے ہوئے کیا۔

(جاری ہے)

میر محمد صادق عمرانی نے کہا کہ ڈیرہ مراد جمالی میں پیپلز پارٹی کے سابقہ دورِ حکومت میں ہی بنیادی ترقیاتی کاموں بشمول گیس کی فراہمی، پانی اور سڑکوں کی تعمیر کا آغاز ہوا تھا، تاہم اس کے بعد کئی سالوں تک شہر ترقیاتی لحاظ سے نظر انداز رہا ،انہوں نے کہا کہ اب جب پیپلز پارٹی کو عوامی خدمت کا دوبارہ موقع ملا ہے تو عوام سے کئے گئے وعدوں کی تکمیل کا عمل تیزی سے جاری ہے۔

میر محمد صادق عمرانی نے کہا کہ پاکستان پیپلز پارٹی ایک حقیقی عوامی جماعت ہے جو عوام کی فلاح و بہبود اور خوشحالی کو اپنی سیاست کا مرکز سمجھتی ہے۔ انہوں نے کہا کہ عوام کی مکمل خوشحالی اور بنیادی سہولیات کی فراہمی تک ترقیاتی سفر جاری رہے گا۔