وفاقی وزیرداخلہ محسن نقوی ایک روزہ دورے پر منامہ پہنچ گئے،بحرینی ہم منصب سے ملاقات،سکیورٹی تعاون میں اضافے سمیت اہم امور بارے تبادلہ خیال کیا

ہفتہ 12 جولائی 2025 10:40

منامہ (اُردو پوائنٹ اخبارتازہ ترین - اے پی پی۔ 12 جولائی2025ء) وفاقی وزیرداخلہ محسن نقوی ایک روزہ دورے پر بحرین کے دارالحکومت منامہ پہنچ گئے، ایئرپورٹ پر بحرینی ہم منصب جنرل شیخ راشد بن عبداللہ الخلفیہ نے ان کا شاندار استقبال کیا۔ وزارت داخلہ سے جاری بیان کے مطابق بحرینی وزارت داخلہ ہیڈ کوارٹر منامہ فورٹ آمد پر وزیر داخلہ محسن نقوی کو گارڈ آف آنرز پیش کیا گیا۔

وزیر داخلہ محسن نقوی کی اپنے بحرینی ہم منصب سے اہم ملاقات ہوئی جس میں باہمی دلچسپی کے امور اور سکیورٹی تعاون بارے تبادلہ خیال ہوا اور سکیورٹی تعاون بڑھانے کی ضرورت پر زور دیا گیا۔ دونوں رہنمائوں کے درمیان انسداد دہشتگردی، انسداد انسانی سمگلنگ اور انسداد منشیات کے حوالے سے دوطرفہ اشتراک کار پر بات چیت ہوئی ۔

(جاری ہے)

ملاقات میں سکیورٹی تعاون کے فروغ ، علاقائی و عالمی چیلنجز سے نمٹنے اور بحرین پاکستان مشترکہ سکیورٹی کمیٹی کے کام کو مزید موثر بنانے کے حوالے سے تبادلہ خیال کیا گیا۔

بحرین کے وزیر داخلہ نے پاکستان اور بحرین کے درمیان سکیورٹی سمیت دیگر شعبوں میں تعاون اور ہم آہنگی کو سراہا اور کہا کہ آپ کا دورہ دونوں ملکوں کے درمیان مضبوط تعلقات پر مبنی سکیورٹی روابط کو مستحکم کرنے کاموقع ہے، پاکستان و بحرین کے درمیان سکیورٹی تعاون و کوآرڈینیشن کو قدر کی نگاہ سے دیکھتے ہیں۔ وزیر داخلہ محسن نقوی نے کہا کہ بحرین اور پاکستان کی وزارت داخلہ کے درمیان انسداد منشیات و انسداد انسانی سمگلنگ کے لئے تعاون بڑھانا وقت کی ضرورت ہے۔

محسن نقوی نے بحرینی ہم منصب کو پاکستان کے دورے کی دعوت دی اور بحرینی وزارت داخلہ میں رکھی کتاب میں اپنے تاثرات بھی درج کئے۔ بحرین کے نائب وزیر داخلہ میجر جنرل عادل بن خلفیہ بن حماد،چیف آف پبلک سکیورٹی، سینئر عسکری افسران، بحرین میں پاکستان کے سفیر ثاقب رئوف، ڈپٹی ہیڈ آف مشن اور اعلیٰ سفارتی حکام بھی اس موقع پر موجود تھے۔\932