پاکستان ہائی کمیشن لندن میں پاکستانی نژاد برطانوی مئیرز، ڈپٹی مئیرز، کونسلرز، اور مقامی نمائندوں کا تاریخی اجتماع

لندن (اُردو پوائنٹ اخبارتازہ ترین - این این آئی۔ 13 جولائی2025ء)پاکستان ہائی کمیشن لندن میں پاکستانی نژاد برطانوی مئیرز، ڈپٹی مئیرز، کونسلرز، اور مقامی نمائندوں کا تاریخی اجتماع ہوا جسمیں برطانیہ میں پاکستانی ہائی کمشنر ڈاکٹر محمد فیصل کی خصوصی دعوت پربرطانیہ بھر سے 250 سے زائد پاکستان نژاد برطانوی منتخب شدہ عوامی نمائندوں نے شرکت کی جبکہ پاکستان ہائی کمیشن میں منعقدہ خصوصی تقریب میں برطانیہ بھر سے مختلف مقامی سیاسی جماعتوں کی نمائندگی کی گئی، گریٹر لندن سے لے کر مڈلینڈز، مانچسٹر، بریڈ فورڈ، برمنگھم اور گلاسگو سے مندوبین نے خصوصی شرکت کی،تقریب میں ہائی کمشنر ڈاکٹر محمد فیصل سمیت چیئرمین یو کے - پاکستان کشمیری کونسلرز فورم لیاقت علی ایم بی ای، شئرئف آف ناٹنگھم زعفران نواز خان، برطانیہ کے مختلف برووز کے کونسلرز بشمول رخسانہ فیاض، ماجد محمود، نظام اعظم، عشرت شاہ، نگہت خان، طارق ڈار اور دیگر نے اپنے خیالات کا اظہار کیا۔

(جاری ہے)

چیرمین او پی ایف سید قمر رضا بھی تقریب میں شریک ہوئے ۔منتخب عوامی نمائیندوں نے کمیونٹی لیڈرشپ کو اکٹھا کرنے کے لیے ہائی کمشنر ڈاکٹر محمد فیصل اور ہائی کمیشن کے عملے کی کاوشوں کو خراج تحسین پیش کیا۔کونسلرز نے پاکستان اور برطانیہ کے مابین معاشی، تجارتی، تعلیمی اور سماجی تعلقات کو فروغ دینے کیلئے اپنے تعاون کا بھرپور اظہار کیا۔

مقررین نے برطانیہ میں موجود پاکستانی کمیونٹی کو مزید متحرک کرنے کے لیے تجاوز پیش کیں۔ڈاکٹر فیصل نے کہاکہ برطانوی نژاد پاکستانی ہمارے "ثقافتی سفیر" ہیں جو محنت، لگن اور استقامت جیسے اقدار کی عکاسی کرتے ہیں۔ انہوںنے کہاکہ پاکستانی نژاد نمائندے برطانیہ میں جمہوریت کو مضبوط کرنے، ثقافتی تنوع کو فروغ دینے اور برطانیہ اور پاکستان کے درمیان پل کے طور پر کام کرنے میں اہم کردار ادا کر رہے ہیں۔

ڈاکٹر فیصل نے کہاکہ بیرون ملک ہماری قوم کی طاقت ہمارے ڈاسپورا کے وقار، اتحاد اور خدمات سے ظاہر ہوتی ہے،پاکستان کی ترقی، آپ کی ترقی سے منسوب ہے۔ انہوںنے کہاکہ کچھ منفی عناصر مذموم مقاصد کے لیے پاکستانی کمیونٹی کو بدنام کرنے کی کوشش کرتے ہیں، ان عناصر کا مل کر مقابلہ کریں گے۔ ہائی کمشنر نے کونسلرز پر زور دیا کہ وہ تعلیم، کاروبار، صحت اور عوامی خدمات میں برٹش پاکستانیوں، بلخصوص خواتین اور نوجوانوں کی کامیابیوں کو اجاگر کریں۔

ڈاکٹر فیصل نے کہاکہ برٹش پاکستانی نوجوان پاکستان کے ثقافتی ورثے کو ترویج دینے اور پاکستان کی معیشت کو مظبوط کرنے میں بھر پور کردار ادا کریں۔ ہائی کمشنر نے قونصلر خدمات اور دو طرفہ تعلقات کے ذریعے پاکستانی کمیونٹی کی بھر پور خدمت کرنے کے عزم کا اعادہ کیا۔ انہوںنے کہاکہ برٹش پاکستانی کمیونٹی پاکستان کو دنیا کے سامنے ایک خودمختار، استقامت اور ترقی پسند قوم کے طور پر پیش کریں۔