پاکستانی نژاد نمائندے برطانیہ میں جمہوریت کی مضبوطی، ثقافتی تنوع کےفروغ اور دونوں ممالک کے درمیان پل کا کردار ادا کر رہے ہیں،پاکستانی ہائی کمشنرڈاکٹر محمد فیصل

لندن (اُردو پوائنٹ اخبارتازہ ترین - اے پی پی۔ 14 جولائی2025ء) برطانیہ میں پاکستان کے ہائی کمشنر ڈاکٹر محمد فیصل نے کہا کہ پاکستانی نژاد نمائندے برطانیہ میں جمہوریت کو مضبوط بنانے، ثقافتی تنوع کو فروغ دینے اور برطانیہ اور پاکستان کے درمیان تعلقات استوار کرنے کے حوالے سے ایک پل کا کردار ادا کر رہے ہیں۔ وہ پاکستان ہائی کمیشن لندن میں برطانوی میئرز، ڈپٹی میئرز، کونسلرز اور پاکستانی نژاد مقامی نمائندوں کے اجتماع سے خطاب کر رہے تھے۔

خصوصی تقریب میں برطانیہ بھر سے پاکستانی نژاد 250 سے زائد برطانوی منتخب نمائندوں نے شرکت کی جبکہ برطانیہ بھر سے مختلف مقامی سیاسی جماعتوں نے بھی نمائندگی کی۔گریٹر لندن سے مڈلینڈز، مانچسٹر، بریڈ فورڈ، برمنگھم اور گلاسگو کے مندوبین نے اس تقریب میں شرکت کی۔

(جاری ہے)

ہائی کمشنر ڈاکٹر محمد فیصل کے ہمراہ چیئرمین یوکے پاکستان کشمیری کونسلرز فورم لیاقت علی ایم بی ای، شیرف آف ناٹنگھم غفران نواز خان، برطانیہ کے مختلف بورو کے کونسلرز بشمول رخسانہ فیاض، ماجد محمود، نظام اعظم، عشرت شاہ، نگہت خان، طارق ڈار اور دیگر نے تقریب میں اپنے خیالات کا اظہار کیا۔

چیئرمین اوورسیز پاکستانیز فائونڈیشن سید قمر رضا نے خصوصی طور پر شرکت کی۔ منتخب عوامی نمائندوں نے کمیونٹی قیادت کو اکٹھا کرنے میں ہائی کمشنر ڈاکٹر محمد فیصل اور ہائی کمیشن کے عملے کی کوششوں کو خراج تحسین پیش کیا۔کونسلرز نے پاکستان اور برطانیہ کے درمیان اقتصادی، تجارتی، تعلیمی اور سماجی تعلقات کے فروغ کے لیے اپنی مکمل حمایت کا اظہار کیا۔

مقررین نے برطانیہ میں پاکستانی کمیونٹی کو مزید متحرک کرنے کیلئے تجاویز دیں۔ پاکستانی ہائی کمشنرڈاکٹر فیصل نے کہا کہ برطانوی نژاد پاکستانی ہمارے ثقافتی سفیرہیں جو محنت، لگن اور استقامت جیسی اقدار کی عکاسی کرتے ہیں۔ انہوں نے کہا کہ بیرون ملک ہماری قوم کی طاقت تارکین وطن کے وقار، اتحاد اور خدمت سے ظاہر ہوتی ہے۔ انہوں نے مزید کہا کہ پاکستان کی ترقی آپ کی ترقی سے وابستہ ہے۔

ڈاکٹر فیصل نے کہا کہ کچھ منفی عناصر نے مذموم مقاصد کیلئے پاکستانی کمیونٹی کو بدنام کرنے کی کوشش کی تاہم ہم مل کر ان عناصر کا مقابلہ کریں گے۔ہائی کمشنر نے کونسلرز پر زور دیا کہ وہ برٹش پاکستانیوں بالخصوص خواتین اور نوجوانوں کی تعلیم، کاروبار، صحت اور عوامی خدمات میں کامیابیوں کو اجاگر کریں۔ انہوں نے زور دیا کہ برطانوی پاکستانی نوجوانوں کو پاکستان کے ثقافتی ورثے کو فروغ دینے اور پاکستان کی معیشت کو مضبوط بنانے میں اہم کردار ادا کرنا چاہیے۔

انہوں نے قونصلر خدمات کے ذریعے اور دو طرفہ تعلقات کو بہتر بنا کر پاکستانی کمیونٹی کی مکمل خدمت کرنے کے اپنے عزم کا اعادہ کیا۔ انہوں نے مزید کہا کہ برطانوی پاکستانی کمیونٹی کو پاکستان کو دنیا کے سامنے ایک خودمختار اور ترقی پسند قوم کے طور پر پیش کرنا چاہیے۔