فواد حسن فواد نے چینی درآمد کرنے کے فیصلے پر سوالات اٹھادیے

قیمتیں کنٹرول کرنا حکومت کا کام ، چینی کی 30 کروڑ ڈالر کی درآمد عوامی مفاد میں نہیں‘ فوراً جائزہ لیا جائے،بیان میں مطالبہ

پیر 14 جولائی 2025 13:24

فواد حسن فواد نے چینی درآمد کرنے کے فیصلے پر سوالات اٹھادیے

اسلام آباد(اُردو پوائنٹ اخبارتازہ ترین - این این آئی۔ 14 جولائی2025ء)سابق نگراں وفاقی وزیرفواد حسن فواد نے چینی درآمد کرنے کے فیصلے پر سوالات اٹھا دیے۔فواد حسن فواد نے ایکس پر جاری کیے گئے اپنے ایک بیان میں چینی کی قیمتیں کنٹرول کرنے کے نام پر 30 کروڑ ڈالر کی چینی درآمد کرنے کے فیصلے پر فوری نظرِ ثانی کا مطالبہ کیا ہے۔انہوں نے کہا کہ قیمتیں کنٹرول کرنا حکومت کا کام ہے، چینی کی 30 کروڑ ڈالر کی درآمد عوامی مفاد میں نہیں لہٰذا اس کا فوراً جائزہ لیا جائے، عام آدمی چینی کا بڑا صارف نہیں بلکہ اصل فائدہ خوراک و مشروبات کی صنعت کو ہے، اس میں ناکامی چینی کی درآمد کا جواز نہیں ہو سکتی۔

انہوں نے مزید کہا کہ عام آدمی نہ مشروبات خرید سکتا ہے اور نہ مٹھائیاں پھر ان کے نام پر درآمد کیوں برآمد کی اجازت دینے پر کیا کوئی جواب دہ ہوگا واضح رہے کہ چند روز قبل وفاقی کابینہ نے 5 لاکھ ٹن چینی درآمد کرنے کا حتمی فیصلہ کیا تھا۔

(جاری ہے)

وزارتِ غذائی تحفظ نے کہا تھا کہ پانچ لاکھ ٹن شوگر درآمد کرنے کا فیصلہ حتمی طور پر ہوگیا ہے اور درآمد حکومتی شعبے کے ذریعے کی جائے گی۔

وزارت کا کہنا تھا کہ درآمد کے لیے تمام انتظامات مکمل کر لیے گئے، درآمد کا جو طریقہ اختیار کیا گیا وہ ماضی کی حکومتوں سے مختلف اور واضح طور پر بہتر حکمت عملی کی نمائندگی کرتا ہے، ماضی میں اکثر اس کی مصنوعی قلت پیدا کر کے قومی خزانے پر بوجھ ڈال کر سبسڈی پر انحصار کیا جاتا تھا۔وزارتِ غذائی تحفظ کا کہنا تھا کہ موجودہ حکومت نے چینی برآمد کرنے کا فیصلہ اس وقت کیا تھا جب چینی وافر مقدار میں دستیاب تھی، لیکن اب چینی کی قیمتوں میں استحکام کے لیے چینی درآمد کی جا رہی ہے۔