جہانگیر ترین کی شمولیت سے متعلق ہاں ہی سمجھیں، ندیم افضل چن نے سینئر سیاستدان کی پیپلزپارٹی میں شمولیت کا اشارہ دیدیا

جہانگیر ترین نے کہا ہے اگر وہ سیاست کریں گے تو مخدوم احمد محمود کے ساتھ کریں گے، پنجاب میں متعدد لوگ پیپلزپارٹی میں آنا چاہتے ہیں لیکن حکومتی ہتھکنڈے پنجاب میں لوگوں کوپارٹی میں شمولیت سے روکتے ہیں، رہنماء پیپلزپارٹی کی گفتگو

فیصل علوی پیر 14 جولائی 2025 16:20

اسلام آباد(اردوپوائنٹ اخبار تازہ ترین۔14جولائی 2025) جہانگیر ترین کی شمولیت سے متعلق ہاں ہی سمجھیں، ندیم افضل چن نے سینئر سیاستدان کی پیپلزپارٹی میں شمولیت کا اشارہ دیدیا، جہانگیر ترین پیپلزپارٹی میں آئے تو ہم انہیں خوش آمدید کہیں گے، جہانگیر ترین نے کہا ہے اگر وہ سیاست کریں گے تو مخدوم احمد محمود کے ساتھ کریں گے،اے آر وائی نیوز کے پروگرام میں گفتگو کرتے ہوئے رہنماء پیپلزپارٹی نے کہا کہ مخدوم احمد محمود پیپلزپارٹی جنوبی پنجاب کے صدراور سینئر رہنما ہیں۔

جہانگیر ترین کی پی پی میں شمولیت سے متعلق پھر ہاں ہی سمجھیں۔ پنجاب میں متعدد لوگ پیپلزپارٹی میں آنا چاہتے ہیں لیکن حکومتی ہتھکنڈے پنجاب میں لوگوں کوپارٹی میں شمولیت سے روکتے ہیں۔ ایک سوال کے جواب میں ندیم افضل چن نے کہا کہ ابھی پیپلزپارٹی کیلئے ہوا سازگار بننے نہیں دی جارہی۔

(جاری ہے)

حکومت کی طرف سے پیپلزپارٹی کوسپیس نہیں دیا جا رہا۔

پیپلزپارٹی نے مطالبہ کیا کہ ہمیں پنجاب میں سپیس دیا جائے۔ پیپلزپارٹی کے بغیرکسی نے نظام چلانے کی کوشش کی تو وہ کامیاب نہیں ہوا۔ 2013 میں نواز شریف کے خلاف دھرنے لگے تو پیپلز پارٹی ساتھ کھڑی ہوئی۔ پیپلزپارٹی نظام کے ساتھ کھڑی رہی تو نظام سے فائدہ اٹھانے والے بچے رہیں گے۔انہوں نے کہا کہ چیئرمین پیپلزپارٹی بلاول بھٹو نے دنیا میں پاکستان کے بیانیے کی جنگ لڑی۔

پیپلزپارٹی چاہتی ہے کہ یہ نظام اور جمہوریت چلتی رہے۔گفتگو کے دوران رہنماء پیپلزپارٹی نے کہا کہ پارٹی کوئی گیم نہیں کھیلتی۔ کوئی مشکل میں پڑتا ہے تو جمہوریت کے پردے کے پیچھے چھپتا ہے۔ کوئی جمہوریت کے پردے کے پیچھے چھپتا ہے تو پارٹی کی مددکی ضرورت پڑ جاتی ہے۔ جب کوئی جمہوریت کے نام پراقتدار کے مزے لیتا ہے تو پیپلزپارٹی میں قباہتیں نظرآتی ہیں۔

ایک اور سوال کے جواب میں ندیم افضل چن نے کہا کہ جمہوریت کیلئے پیپلزپارٹی سے زیادہ کسی نے قربانیاں نہیں دیں۔ بے نظیر بھٹو شہیدکو مچھ جیل میں قید کیا گیا جہاں بجلی نہیں تھی۔ان کے خاوند11سال جیل میں رہے۔ بے نظیر بھٹو کے بچے دربدر ہوگئے۔ انہوں نے کارکن کے ساتھ جدوجہد کی۔ کسی کی مشکلات کا موازنہ نہیں کیا جاتا۔ سہولتوں کا موازنہ کیا جاتا ہے۔

بانی پی ٹی آئی عمران خان سے متعلق سوال پررہنماء پیپلز پارٹی نے کہا کہ کسی کیلئے مشکل ہو یا نہیں لیکن جیل جیل ہوتی ہے۔ میں نے جب بانی پی ٹی آئی سے پہلی بار ملاقات کی انہیں کہا تھا جیل ریفارمز کریں۔ جو آج جمہوریت کے چیمپئن بنے ہوئے ہیں وہ پہلے کہتے تھے اسمبلی سے استعفیٰ دیں۔ پیپلزپارٹی نے اس وقت کہاکہ استعفے نہیں دیں گے آئینی راستہ اختیار کریں گے۔ پیپلزپارٹی نے پی ڈی ایم بنائی پھر ہمیں پی ڈی ایم چھوڑنی پڑ گئی۔