ایگریکلچرل ریسرچ کونسل میں مبینہ غیرقانونی بھرتیوں پر صدارتی ایوارڈ یافتہ سائنسدان گرفتار

اسلام آباد ( اُردو پوائنٹ اخبارتازہ ترین۔ 14 جولائی 2025ء ) پاکستان ایگریکلچرل ریسرچ کونسل میں مبینہ غیرقانونی بھرتیوں پر صدارتی ایوارڈیافتہ سائنسدان کو گرفتار کرلیا گیا۔ میڈیا رپورٹس کے مطابق وفاقی تحقیقاتی ادارے (ایف آئی اے) نے پاکستان ایگریکلچرل ریسرچ کونسل (پی اے آر سی) کے چیئرمین اور صدارتی ایوارڈ یافتہ سائنسدان ڈاکٹر غلام محمد علی کو مبینہ بدعنوانی اور غیرقانونی بھرتیوں سے متعلق مقدمے میں گرفتار کیا۔

اس حوالے سے بتایا گیا ہے کہ مقدمے میں پی اے آر سی کے چیئرمین کے علاوہ ادارے کے 18 مزید افسران کو بھی نامزد کیا گیا، گرفتار کیے جانے والے ڈاکٹر غلام محمد علی اور دیگر افسران پر الزام ہے کہ انہوں نے 164 آسامیوں کا اشتہار دے کر غیرقانونی طور پر 332 عہدوں پر بھرتیاں کیں۔

(جاری ہے)

مقدمے کی ایف آئی آر میں ان پر الزام عائد کیا گیا ہے کہ نامزد ملزمان نے اپنے عہدوں کو غلط استعمال کرتے ہوئے غیرقانونی مالی فائدہ حاصل کیا، تنخواہوں کی مد میں قومی خزانے کو نقصان پہنچایا، سب سے بڑھ کر حقیقت تو یہ ہے کہ موجودہ قوانین اور ایس او پیز کو بالائے طاق رکھ کر 164 آسامیوں کو بڑھا کر 332 صرف اس لیے کیا گیا تاکہ اپنے رشتے داروں اور دوستوں کو فائدہ پہنچایا جا سکے۔

دوسری طرف سرمایہ کاری کی آڑ میں آن لائن فراڈ کے معاملے میں گرفتار 14 ملزمان کو پانچ روزہ ریمانڈ کے بعد عدالت پیش کر دیا گیا، نیشنل سائبر کرائم ایجنسی کی جانب سے گرفتار ملزمان کو سپیشل مجسٹریٹ ملک اشفاق کی عدالت میں پیش کیا گیا، نیشنل سائبر کرائم ایجنسی کی جانب سے چند روز قبل آن لائن فراڈ کرنے والے نیٹ ورک کو بے نقاب کیا گیا تھا، اس کارروائی کے دوران 149 ملکی اور غیر ملکی افراد کو گرفتار کیا گیا، فیصل آباد میں ملزمان انویسٹمنٹ اور پونزی سکیم کا جھانسا دے کر اربوں روپے کا آن لائن فراڈ کر رہے تھے، فراڈ گینگ کے مبینہ سرغنہ ملک تحسین ایوان عدالت سے عبوری ضمانت پر ہیں۔

یاد رہے کہ یہ کال سینٹر فیصل آباد الیکٹرک سپلائی کمپنی(فیسکو)کے سابق چیئرمین بورڈ آف ڈائریکٹرز ملک تحسین اعوان کی رہائش گاہ پر بنایا گیا تھا، ملزمان کے خلاف دھوکا دہی، جعل سازی اور فراڈ سرمایہ کاری منصوبوں میں ملوث ہونے کی بنیاد پر کل 7 مقدمات درج کیے گئے ہیں، چھاپے کے دوران فراڈ کال سینٹر سے گرفتار 149 ملزمان میں 131 مرد اور 18 خواتین شامل ہیں، ان میں 73 غیر ملکی شہری شامل ہیں، نائجیرین 3 مرد اور 5 خواتین، فلپائنی 1 مرد اور 3 خواتین، سری لنکن 1 مرد اور 1 خاتون، بنگلہ دیشی 6 مرد، زمبابوے کی 1 خاتون، میانمار کی 2 خواتین اور 44 دیگر غیرملکی جبکہ پاکستانی 76 مرد اور 2 خواتین شامل ہیں۔