ایف آئی اے اینٹی کرپشن کی کارروائی، پی اے آرسی چیئرمین اور ڈائریکٹر اسٹیبلشمنٹ کا جسمانی ریمانڈ منظور

پیر 14 جولائی 2025 20:10

اسلام آباد (اُردو پوائنٹ اخبارتازہ ترین - این این آئی۔ 14 جولائی2025ء)عدالت نے غیر قانونی بھرتیوں کیس میں چیئرمین پی اے آرسی اور ڈائریکٹر اسٹیبلشمنٹ کا 3روزہ جسمانی ریمانڈ منظور کرلیا۔ پیر کو ایف آئی اے نے پاکستان ایگریکلچر ریسرچ کونسل کے چیئرمین صدارتی ایوارڈ یافتہ سائنسدان ڈاکٹر غلام محمد علی اور ڈائریکٹر اسٹیبلشمنٹ اخلاق احمد کو ڈسٹرکٹ اینڈ سیشن کورٹس اسلام آباد میں ڈاکٹر غلام علی کو جوڈیشل مجسٹریٹ احمد شہزاد گوندل کی عدالت میں پیش کیا ۔

پراسیکیوٹر نے کہا کہ چیئرمین پی اے آر سی کو غیرقانونی بھرتیوں اور اختیارات کے ناجائز استعمال کے الزام میں گرفتار کیا گیا ہے، ایف آئی اے نے اس معاملہ میں ملوث ڈائریکٹر اسٹیبلشمنٹ اخلاق ملک کو بھی گرفتار کیا ہے، چیئرمین پی اے آر سی نے 164 منظور شدہ آسامیوں پر 332 افراد غیر قانونی طریقہ سے بھرتی کیے ہیں۔

(جاری ہے)

عدالت کو پراسیکیوٹر نے مزید بتایا کہ ایف آئی اے اس معاملے پر ابھی مزید تحقیقات کررہی ہے۔

ایف آئی اے کے مطابق پی اے آر سی کے چیئرمین ڈاکٹر غلام محمد علی سمیت 19 افسروں کے خلاف ایف آئی اے نے مقدمہ درج کر رکھا ہے، غیر قانونی بھرتیوں کے لیے مبینہ رشوت لینے کے الزامات بھی ہیں۔ایف آئی اے کی جانب سے ملزمان کے 7 دن کے جسمانی ریمانڈ کی استدعا کی گئی ۔چیئرمین پی اے آرسی نے مؤقف اپنایا کہ تمام آسامیوں کا اشتہار دیا گیا تھا، تمام بھرتیوں کی سلیکشن کیلئے کمیٹیاں بنائی گئی تھیں، اس پر جج احمد شہزاد گوندل نے کہا کہ ابھی اس معاملے پر تحقیقات ہونی ہیں، چیزیں سامنے آئیں گی۔بعد ازاں عدالت نے ملزمان کو 3 دن کے جسمانی ریمانڈ پر ایف آئی اے کے حوالے کردیا۔