معصوم و بے گناہ مسافروں کو مارنے سے بلوچستان آزاد نہیں ہو سکتا ،ماہ جبین شیران

پیر 14 جولائی 2025 20:10

کوئٹہ(اُردو پوائنٹ اخبارتازہ ترین - این این آئی۔ 14 جولائی2025ء)سابق رکن صوبائی اسمبلی معروف سماجی و سیاسی رہنماء ماہ جبین شیران نے اپنے ایک بیان میں بلوچستان کے ضلع ژوب میں سرڈھاکہ کے مقام پر بے گناہ مسافروں کے قتل کی شدید الفاظ میں مذمت کرتے ہوئے کہا ہے کہ"معصوم و بے گناہ مسافروں کو مارنے سے بلوچستان آزاد نہیں ہو سکتا نہ ہی اس طرح کی بزدلانہ کارروائیوں سے کسی سیاسی مقصد کو حاصل کیا جاسکتا ہے۔

"انہوں نے کہا کہ واقعے میں بے گناہ پنجابی مسافروں کو ان کی زبان اور شناخت کی بنیاد پر چن چن کر قتل کرنا انسانیت کے خلاف جرم ہے جو نہ صرف ظلم و بربریت کی انتہا ہے بلکہ اس سے دہشتگردوں کا گھناؤنا چہرہ کھل کر سامنے آ گیا ہے۔ ماہ جبین شیران نے کہا کہ"صوبہ بلوچستان تمام اقوام کا صوبہ ہے اور پنجابی، پشتون، بلوچ، سرائیکی، ہزارہ اور دیگر قومیتوں کے لوگ یہاں مل جل کر صدیوں سے بھائی چارے سے رہ رہے ہیں۔

(جاری ہے)

کسی ایک قوم یا شناخت کو نشانہ بنانا ملکی یکجہتی پر حملہ ہے۔"انہوں نے متاثرہ خاندانوں سے دلی ہمدردی اور تعزیت کا اظہار کرتے ہوئے ریاست سے مطالبہ کیا کہ وہ دہشتگردوں کو فوری طور پر کیفر کردار تک پہنچائیں۔ ماہ جبین شیران نے کہا کہ وہ اس وقت عمرے کی ادائیگی کے لیے مکہ مکرمہ میں موجود ہیں اور مقدس مقامات پر پاکستان و بلوچستان کے امن، اتحاد اور مظلوموں کے لیے خصوصی دعائیں کر رہی ہیں۔