شمالی امریکی ممالک کو پاکستانی برآمدات میں 11 ماہ کے دوران 10.19 فیصد اضافہ

منگل 15 جولائی 2025 13:35

اسلام آباد (اُردو پوائنٹ اخبارتازہ ترین - اے پی پی۔ 15 جولائی2025ء) پاکستان سے شمالی امریکی ممالک کو گزشتہ مالی سال کے ابتدائی 11 ماہ کے دوران کی جانے والی برآمدات میں 10.19 فیصد اضافہ ہوا ہے۔ سٹیٹ بینک آف پاکستان (ایس بی پی) کی رپورٹ کے مطابق گزشتہ مالی سال میں جولائی 2024 تا مئی 2025 کے دوران برآمدات کا حجم 5.91 ارب ڈالر تک پہنچ گیا جبکہ جولائی 2023 تا مئی 2024 کے دوران شمالی امریکی ممالک کو کی جانے والی برآمدات سے 5.363 ارب ڈالر زر مبادلہ حاصل ہوا تھا۔

اس طرح مالی سال 24-2023 کے مقابلہ میں گزشتہ مالی سال 25-2024 کے پہلے 11 مہینوں میں شمالی امریکا کو کی جانے والی برآمدات میں 0.547 ارب روپے یعنی 10.19 فیصد کی بڑھوتری ریکارڈ کی گئی ہے۔ رپورٹ کے مطابق اس دوران سب سے زیادہ برآمدات امریکا کو کی گئیں جو شمالی امریکا کو کی جانے والی مجموعی برآمدات کا 94 فیصد ہیں ۔

(جاری ہے)

گزشتہ مالی سال کے 11 ماہ میں شمالی امریکی ممالک کو کی جانے والی قومی برآمدات میں 11.06 فیصد کا اضافہ ہوا اور برآمدات کا حجم 5.552 ارب روپے تک پہنچ گیا جبکہ مالی سال 24-2023 کے اسی عرصہ میں برآمدات کی مالیت 4.999 ارب روپے رہی تھی۔

ایس بی پی کے مطابق کینیڈا کو کی جانے والی برآمدات میں گزشتہ مالی سال کے 11 ماہ میں 1.68 فیصد کمی ہوئی ہے اور برآمدات کی مالیت 363.34 ملین ڈالر کے مقابلہ میں 357.23 ملین ڈالر تک کم ہوگئی۔ دوسری جانب گزشتہ مالی سال کے دوران شمالی امریکا سے کی جانے والی درآمدات میں 25.8 فیصد کا اضافہ ہوا اور درآمدات کی مالیت 1.887 ارب ڈالر کے مقابلہ میں 2.374 ارب ڈالر تک بڑھ گئی۔

واضح رہے کہ گزشتہ مالی سال کے پہلے 11 ماہ میں امریکا سے کی جانے والی درآمدات میں 23.82 فیصد کا اضافہ ریکارڈ کیا گیا اور درآمدات کی مالیت1.739ارب ڈالر کے مقابلہ میں 2.153 ارب ڈالر تک پہنچ گئی۔ مزید برآں لاطینی امریکا کو کی جانے والی برآمدات میں گزشتہ مالی سال کے دوران 23.82 فیصد شرح نمو ریکارڈ کی گئی اور برآمدات کی مالیت 71.17 ملین ڈالر رہی ہے جبکہ مالی سال 24-2023 کے پہلے گیارہ ماہ میں لاطینی امریکا کو کی گئی برآمدات سے 57.47 ملین ڈالر زرمبادلہ کمایا گیا تھا۔\395