نئے اراکین کی حلف برداری کیلئے اجلاس فوری بلایا جائے، گورنر سیکریٹریٹ کا وزیراعلیٰ ہاؤس کو خط

سپریم کورٹ کے فیصلے کے مطابق مخصوص نشستوں پر منتخب اراکین کی حلف برداری کو یقینی بنانا ضروری ہے، خط

منگل 15 جولائی 2025 20:55

پشاور(اُردو پوائنٹ اخبارتازہ ترین - این این آئی۔ 15 جولائی2025ء)الیکشن کمیشن کے خط پر گورنر سیکرٹریٹ نے وزیراعلیٰ سیکریٹریٹ کو خط لکھ دیا جس میں کہا ہے کہ مخصوص نشستوں پر منتخب اراکین اسمبلی کی حلف برداری کیلئے کے پی اسمبلی کا اجلاس فوری طور پر بلایا جائے۔ذرائع کے مطابق الیکشن کمیشن آف پاکستان کے خط پر گورنر سیکریٹریٹ خیبرپختونخوا نے وزیراعلیٰ سیکریٹریٹ کو باضابطہ طور پر خط لکھ دیا۔

پرنسپل سیکریٹری ٹو گورنرزبیر ارشد نے وزیراعلیٰ خیبرپختونخوا کے پرنسپل سیکریٹری کے نام یہ خط ارسال کیا۔خط میں کہا گیاکہ الیکشن کمیشن نے صوبائی اسمبلی کا اجلاس طلب کرنے کی تحریری ہدایات جاری کی ہیں تاکہ سپریم کورٹ آف پاکستان کے فیصلے کے مطابق مخصوص نشستوں پر منتخب اراکین کی حلف برداری کو یقینی بنایا جاسکے۔

(جاری ہے)

خط کے مطابق خیبرپختونخوا حکومت کے رولز آف بزنس 1985کے رول 36(1)(a)بمعہ شیڈول Vکے تحت صوبائی اسمبلی کا اجلاس طلب کرنے کا معاملہ معزز گورنر خیبرپختون خوا کو وزیراعلیٰ خیبرپختونخوا کے ذریعے بھیجا جانا ضروری ہے۔

خط میں کہا گیاکہ الیکشن کمیشن آف پاکستان اور معزز سپریم کورٹ آف پاکستان کے احکامات پر حقیقی معنوں میں عملدرآمد کو یقینی بنانے کیلئے آئین کے آرٹیکل 109(a)کے تحت صوبائی اسمبلی کا اجلاس فوری طور پر طلب کرنے کیلئے ضروری اقدامات کیے جائیں۔