ہر منصوبے کی بروقت تکمیل کیلئے حکومت متبادل تنازعہ حل کرنے کا طریقہ کار فراہم کریگی،احسن اقبال کی بزنس کمیونٹی کو یقین دہانی

منگل 15 جولائی 2025 22:45

اسلام آباد(اُردو پوائنٹ اخبارتازہ ترین - این این آئی۔ 15 جولائی2025ء)فاقی وزیر منصوبہ بندی و ترقی احسن اقبال نے بزنس کمیونٹی کو یقین دہانی کروائی ہے کہ آئندہ ہر منصوبے کی بروقت تکمیل کیلئے حکومت متبادل تنازعہ حل کرنے کا طریقہ کار فراہم کرے گی۔منگل کوایسوسی ایشن آف کنسلٹنگ انجینئرز پاکستان کی جانب سے منعقدہ تین روزہ بین الاقوامی کانفرنس سے خطاب کرتے ہوئے احسن اقبال نے کہاکہ سرمایہ کاروں کے ہر جائز مطالبے کو بلا چوں چرا پورا کیا جائے گا۔

انہوں نے کہاکہ موجودہ ترقیاتی سمت پائیدار ترقی، ماحول دوست اقدامات اور کم لاگت حل پر منحصر ہے۔انہوں نے کہا کہ اڑان پاکستان پروگرام میں عوامی و نجی شراکت داری کو فروغ دیا گیا ہے، لیکن حکومت کے مساوی مواقع اور شفافیت کے بغیر یہ حقیقی کامیابی حاصل نہیں کر سکتا۔

(جاری ہے)

وفاقی وزیرنے شرکا کو یقین دلایا کہ حکومت جلد ہی ترقیاتی منصوبوں میں تنازعات کے حل اور عدالتی مقدمات کی فوری تکمیل کیلئے ضروری قانونی ڈھانچہ متعارف کروائے گی۔

انہوں نے ایف آئی ڈی آئی سی کے کردار کو سراہا اور ایس اے سی ای پی کو پاکستان میں عالمی سطح کی انجینئرنگ کمپنیوں کو مدعو کرنے پر خراج تحسین پیش کیا۔اس تقریب کا مرکز پاکستان میں انجینئرنگ کمپنیوں کا انفراسٹرکچر کی ترقی میں کردار تھا، اور اس میں حکومت کو ترقیاتی عمل تیز کرنے کے لیے اہم تجاویز بھی پیش کی گئیں۔دنیا بھر سے صف اول کی انجینئرنگ کمپنیاں اس تقریب میں شریک ہیں، جو آئندہ دو دنوں تک جاری رہے گی۔

ایسوسی ایشن آف کنسلٹنگ انجینئرز پاکستان کے صدر وسیم اصغر نے حکومت سے مطالبہ کیا کہ وہ ملک میں انجینئرنگ کورٹس کے قیام کے لیے قانون سازی کرے۔انہوں نے کہا کہ اگر کوئی انفراسٹرکچرل منصوبہ قانونی چارہ جوئی کی زد میں آ جائے تو اس کی لاگت کئی گنا بڑھ جاتی ہے۔ انہوں نے کہا کہ خصوصی عدالتوں کا قیام ملک کو اربوں ڈالر کی بچت دے سکتا ہے۔انہوں نے عہد کیا کہ اے سی ای پی حکومت سے ان قوانین کے نفاذ اور اطلاق میں مکمل تعاون کرے گا۔تقریب سے ایف آئی ڈی آئی سی کی صدر کیتھرین کاراکتسانس، ایم ڈی پی ٹی ڈی سی آفتاب الرحمن رانا، اور ایف آئی ڈی آئی سی کے نائب صدر ودہون چیامچتترونگ نے بھی خطاب کیا۔