Live Updates

بارش کا سلسلہ وقفہ وقفہ سے جاری ،واسا راولپنڈی ہائی الرٹ

بدھ 16 جولائی 2025 19:40

راولپنڈی (اُردو پوائنٹ اخبارتازہ ترین - اے پی پی۔ 16 جولائی2025ء) راولپنڈی میں بدھ کے روز بارش کا سلسلہ وقفہ وقفہ سے جاری رہا۔ محکمہ موسمیات کے مطابق سید پور کے مقام پر 11 ملی میٹر، گولڑہ 9 ملی میٹر، بوکڑہ 6 ملی میٹر، پی ایم ڈی 19 ملی میٹر، شمس آباد 20 ملی میٹر، کچہری 5 ملی میٹر جبکہ پیر ودھائی کے مقام پر 5 ملی میٹر بارش ریکارڈ کی جا چکی ہے۔ ایم ڈی واسا خود فیلڈ میں موجود رہے اور انہوں نے نکاسی آب آپریشن کی نگرانی کی۔

منیجنگ ڈائریکٹر واسا محمد سلیم اشرف نے اس موقع پر گفتگو کرتے ہوئے کہا کہ مون سون بارشوں کے پیش نظر واسا راولپنڈی ہائی الرٹ ، عملہ و ہیوی مشینری نشیبی علاقوں میں تعینات ہے۔ بارش ہلکی ہونے کیوجہ سے راولپنڈی میں کسی بھی جگہ پانی کھڑا نہیں ہوا۔ رم جھم سے جہاں موسم خوشگوار ہوا ہے وہاں ان بارشوں سے زیر زمین پانی کی سطح میں بہتری آئیگی۔

(جاری ہے)

حالیہ برشوں سے ڈیمز میں پانی کے ذخیرے میں اضافہ ہوا ہے۔ راول ڈیم میں میں پانی کی سطح 1745 ایکڑ فٹ تک پہنچ چکی ہے جبکہ راول ڈیم میں پانی ذخیرہ کرنے کی استعداد 1752 ایکڑ فٹ ہے۔ انہوں نے کہا کہ نالہ لئی اور شہر بھر کے نالوں کی مانیٹرنگ کی جارہی ہے تاہم ابھی نالہ لئی میں پانی کا بہاؤ معمول کے مطابق ہے۔ نالہ میں کٹاریاں کے مقام پر 5 فٹ جبکہ گوالمنڈی پل پر 4 فٹ ہے۔ کسی بھی قسم کی ایمرجنسی صورتحال سے نپٹنے کیلئے تیار ہیں۔