وزیراعلیٰ پنجاب کی صوبہ بھر کی نوتعمیرشدہ سڑکوں اور گلیوں کی بیوٹیفکیشن کرنے کی ہدایت

66 شہروں میں ترجیحی بنیادوں پر ترقیاتی پراجیکٹس شروع کرنے کا فیصلہ، پنجاب کا کوئی شہر اب ترقی کے ثمرات سے محروم نہیں رہے گا، 189 شہروں کو لاہور کی طرز پر خوبصورت بنائیں گے، وزیراعلیٰ مریم نواز شریف

ثنااللہ ناگرہ بدھ 16 جولائی 2025 19:48

وزیراعلیٰ پنجاب کی صوبہ بھر کی نوتعمیرشدہ سڑکوں اور گلیوں کی بیوٹیفکیشن ..

لاہور (اُردو پوائنٹ اخبارتازہ ترین۔ 16 جولائی 2025ء) وزیراعلیٰ پنجاب مریم نواز شریف کی زیرصدارت خصوصی اجلاس منعقد ہوا جس میں لاہور ڈویلپمنٹ پروگرام اور پنجاب ڈویلپمنٹ پروگرام پر پیش رفت کا جائزہ لیا گیا۔ ڈپٹی کمشنر لاہور نے لاہور ڈویلپمنٹ پروگرام پر پیشرفت پر بریفنگ دی۔ اجلاس میں بتایا گیا کہ لاہور ڈویلپمنٹ پروگرام کے فیزون کی 5643 پراجیکٹ میں سے 2593 پراجیکٹ مکمل ہوچکے ہیں۔

لاہور میونسپل کارپوریشن کی 3705 میں سے 2274 منصوبے مکمل کر لئے گئے ہیں۔ واسا لاہور کے 252میں سے 170 منصوبے بھی مکمل ہوچکے ہیں۔ اجلاس میں واسا پراجیکٹس سے منسلک 1573 منصوبوں پر پیشرفت کا جائزہ لیا گیا۔ وزیراعلیٰ مریم نواز شریف نے نوتعمیر شدہ روڈز اور سٹریٹ کی بیوٹیفکیشن کرنے کی ہدایت کی۔

(جاری ہے)

اجلاس میں لاہور ڈویلپمنٹ پلان کے فیز ون کی نومبر2025ء میں تکمیل کا ہدف بھی دے دیا گیا۔

لاہور ڈویلپمنٹ پروگرام کے فیز ٹو میں علامہ اقبال، واہگہ اور عزیز بھٹی ٹاؤن کے 146 ترقیاتی منصوبے شامل کئے گئے ہیں۔ وزیراعلیٰ مریم نواز شریف کو پنجاب ڈویلپمنٹ پروگرام کے تحت 189 شہروں کی تعمیر ومرمت اور بحالی کے پراجیکٹس پر رپورٹ بھی پیش کی گئی۔ اجلاس میں فیز ون کے تحت زیادہ خراب حالت والے گلی محلے اور علاقوں کو پنجاب ڈویلپمنٹ پروگرام میں ترجیح دینے کا فیصلہ کیا گیا ہے۔

اس موقع پر66 شہروں میں ترجیحی بنیادوں پر ترقیاتی پراجیکٹس شروع کرنے کا بھی فیصلہ کیا گیا ہے۔ پنجاب کے 66 شہروں میں واٹر ٹینک،ڈرین ڈسپوزل ا سٹیشن اور ٹرنک سیوریج وغیرہ بنائے جائیں گے۔ وزیراعلیٰ مریم نواز شریف نے کہا کہ پنجاب کا کوئی شہر اب ترقی کے ثمرات سے محروم نہیں رہے گا۔پنجاب بھر کے 189 شہروں کو لاہور کی طرز پر خوبصورت اور ترقی یافتہ بنائیں گے۔