لاہورپولیس نے سندھ کو مطلوب اشتہاری دہشتگرد گرفتارکرلیا

ملزم گرفتاری سے بچنے کے لیے طویل عرصے سے لاہورمیں روپوش تھا

جمعرات 17 جولائی 2025 15:53

لاہورپولیس نے سندھ کو مطلوب اشتہاری دہشتگرد گرفتارکرلیا

لاہور(اُردو پوائنٹ اخبارتازہ ترین - این این آئی۔ 17 جولائی2025ء)لاہور پولیس نے کارروائی کرتے ہوئے سندھ پولیس کو مطلوب دہشتگردوں کے سہولت کار اور اشتہاری ملزم صدیق کو گرفتار کر لیا،ڈولفن اسکواڈ نے کارروائی کے دوران ملزم کو گلشن راوی کے علاقے سے حراست میں لیا۔پولیس ذرائع کے مطابق ملزم صدیق کے خلاف چھ سال قبل دہشتگردوں کی مدد، سہولت کاری اور فنڈنگ میں معاونت کا مقدمہ تھانہ گلشن اقبال ایسٹ میں درج کیا گیا تھا۔

(جاری ہے)

ملزم گرفتاری سے بچنے کے لیے طویل عرصے سے لاہور میں روپوش تھا اور مختلف علاقوں میں رہائش بدل کر قانون نافذ کرنے والے اداروں کی آنکھوں میں دھول جھونک رہا تھا،تاہم لاہور پولیس کی انٹیلیجنس اور گشت پر مامور فورسز کی مستعدی نے ملزم کو دھر لیا۔پولیس نے ملزم کو گرفتار کرنے کے بعد ابتدائی تفتیش کے لیے تھانہ گلشن راوی منتقل کر دیا اور سندھ پولیس کو اس بارے میں باقاعدہ اطلاع دے دی گئی ہے۔پولیس حکام کے مطابق دہشتگردی میں معاونت کرنے والے افراد کے خلاف زیرو ٹالرنس پالیسی کے تحت کارروائیاں جاری رہیں گی۔