جامعہ کراچی کے پروفیسر سے بدسلوکی کرنے والا رینجرز اہلکار معطل، کارروائی کا حکم

انجمن اساتذہ کی سوشل میڈیا پر واقعے کو ریاستی اداروں کے خلاف استعمال کرنے کی شدید مذمت

جمعرات 17 جولائی 2025 22:05

کراچی(اُردو پوائنٹ اخبارتازہ ترین - این این آئی۔ 17 جولائی2025ء)جامعہ کراچی میں پروفیسر ڈاکٹر آفاق احمد صدیقی سے بدسلوکی کرنے والے رینجرز اہلکار کو معطل کر دیا گیا، جبکہ سیکٹر کمانڈر نے واقعے کا فوری نوٹس لیتے ہوئے سخت ادارہ جاتی کارروائی کے احکامات جاری کر دیے۔تفصیلات کے مطابق جامعہ کراچی میں انجمن اساتذہ کی مجلس عاملہ کا اجلاس اسٹاف کلب میں منعقد ہوا، جس میں استاد پروفیسر ڈاکٹر آفاق احمد صدیقی سے 3 روز قبل پیش آنے والے افسوسناک واقعے پر تفصیلی غور کیا گیا۔

اجلاس میں بتایا گیا کہ رینجرز کے اہلکار کی جانب سے بدسلوکی کے واقعے پر سیکٹر کمانڈر نے فوری ایکشن لیتے ہوئے متعلقہ اہلکار کو معطل کر دیا اور ادارہ جاتی کارروائی کے احکامات بھی جاری کیے۔ڈاکٹر آفاق صدیقی نے اجلاس میں بتایا کہ واقعے کے فورا بعد صدر انجمن ڈاکٹر محسن علی اور شیخ الجامعہ پروفیسر ڈاکٹر خالد محمود عراقی نے ان سے رابطہ کیا اور مکمل تعاون کا یقین دلایا۔

(جاری ہے)

اگلی صبح رینجرز کے اعلی حکام نے صدر انجمن کے دفتر میں ڈاکٹر آفاق سے ملاقات کی، جس میں سیکریٹری ڈاکٹر معروف بن روف اور ڈاکٹر ندا علی بھی موجود تھے۔ رینجرز افسران نے واقعے کی سخت مذمت کرتے ہوئے ڈاکٹر آفاق سے معذرت کی اور مکمل انکوائری کی یقین دہانی کروائی۔بعدازاں، شیخ الجامعہ اور صدر انجمن نے ڈاکٹر آفاق کے گھر جا کر ان سے اظہارِ یکجہتی کیا، جب کہ شام 4 بجے ڈاکٹر آفاق کی سیکٹر کمانڈر سے ملاقات ہوئی، جس میں بدسلوکی کرنے والے اہلکار کو فوری معطل کر کے کارروائی کا آغاز کیا گیا۔

انجمن اساتذہ جامعہ کراچی کے جوائنٹ سیکریٹری ڈاکٹر محمد فیصل اعوان کے مطابق ڈاکٹر آفاق صدیقی نے اس موقع پر جامعہ کے اساتذہ، طلبہ، ملازمین اور تمام ذمہ دار حکام کا شکریہ ادا کرتے ہوئے واقعے پر ہونے والی پیش رفت پر مکمل اعتماد کا اظہار کیا۔انہوں نے سوشل میڈیا پر واقعے کو ریاستی اداروں کے خلاف استعمال کرنے والی منفی قوتوں کی شدید مذمت بھی کی۔

اجلاس میں تمام شرکا نے شیخ الجامعہ، سیکٹر کمانڈر، صدر انجمن اور دیگر حکام کی بروقت کارروائی کو سراہا اور اداروں پر اپنے مکمل اعتماد کا اظہار کیا۔اجلاس میں صدر انجمن ڈاکٹر محسن علی، جوائنٹ سیکریٹری ڈاکٹر محمد فیصل عوان، ڈاکٹر ندا علی، جناب غفران عالم، ڈاکٹر معیز، پروفیسر باسط انصاری، پروفیسر انتخاب الفت، پروفیسر عظمی عاشق، ڈاکٹر اسد تنولی، ڈاکٹر ذیشان اقبال، ڈاکٹر ذیشان عباس، ڈاکٹر اصف رضا خان، ڈاکٹر وقار اور ڈاکٹر کامران نے شرکت کی۔