شہباز حکومت کے 1 فیصلے نے شوگر ملز مالکان کو مالا مال کر دیا

لاہور ( اُردو پوائنٹ اخبارتازہ ترین۔ 18 جولائی 2025ء ) شہباز حکومت کے 1 فیصلے نے شوگر ملز مالکان کو مالا مال کر دیا، چینی کی بیرون ملک فروخت کی حکومتی اجازت کے بعد شوگر ملز 212 ارب روپے کمانے میں کامیاب۔ تفصیلات کے مطابق شہباز حکومت کی جانب سے شوگر ملز پر کی جانے والی مہربانیوں سے متعلق ہوشربا انکشافات سامنے آئے ہیں۔ سینئر صحافی محمد مالک نے اے آر وائی نیوز سے گفتگو کرتے ہوئے انکشاف کیا ہے کہ "شوگر مافیا نے پاکستان کو اربوں روپے کا ٹیکہ لگایا ہے۔

چینی مافیا نے چینی ایکسپورٹ کر کے 114 ارب روپے کمائے، پھر قیمتوں میں اضافہ کر کے مزید 98 ارب روپے حاصل کیے۔ ابھی یہ بحث ختم بھی نہیں ہوئی تھی کہ چینی ایکسپورٹ کی اجازت کس نے دی، تو حکومت اور شوگر ملز ایسوسی ایشن کے درمیان دوبارہ ایکسپورٹ کا معاہدہ ہو گیا ہے۔

(جاری ہے)

" جبکہ سابق چیئرمین ایف بی آر شبر زیدی نے انکشاف کیا ہے کہ حکومت چاہے تحریک انصاف کی ہو، ن لیگ کی ہو یا پیپلزپارٹی کی ہو، وہ چینی مافیا کے سامنے کھڑی ہو ہی نہیں سکتیں بلکہ حکومتیں تو چھوڑیں شوگر مافیا کے سامنے فوج بھی کھڑی نہیں ہوسکتی، میں یہ گارنٹی سے کہہ سکتا ہوں۔

24 نیوز کے پروگرام میں گفتگو کرتے ہوئے انہوں نے کہا کہ پاکستان میں چینی کے نام پر جس طرح کھیل ہوتا رہا ہے یہ تقریباً ہر دور حکومت میں ہوا ہے، جس وقت عمران خان کی حکومت گئی تھی تب چینی کی زیادہ سے زیادہ مارکیٹ قیمت 85 روپے فی کلو تھی اور آج چینی کی قیمت 200 روپے تک پہنچ چکی ہے، پاکستان میں بہت سارے لوگوں کو حقائق معلوم نہیں ہیں کہ ملک میں موجود کل 84 شوگر ملوں میں سے 90 فیصد شوگر ملز سیاستدانوں کی ہیں، چند ایک کے سوا باقی سب بڑے سیاسدان شوگر ملوں کے مالکان ہیں۔

شبرزیدی نے مزید کہا کہ کہ شوگر ملز جو چینی بناتی ہیں اس کی دو منڈیاں ہیں جن میں سے ایک کراچی اور دوسری فیصل آباد ہے، ملک کی 84 شوگر ملوں کے صرف 12 سے 15 ڈیلر ہیں اور پاکستان کی پوری شوگر انڈسٹری میں ایک بھی ڈیلر رجسٹرڈ نہیں ہے وہ چینی کے بادشاہ ہیں، چینی جب مل میں بنتی ہے اور اس کے بعد سے جب بکتی ہے تو درمیان میں کوئی ٹریل نہیں ہے، میری ان لوگوں کو کہتے جان نکل گئی کہ رجسٹریشن کراؤ لیکن وہ لوگ میرے اوپر ہنستے تھے کہ یہ پاگل ہے۔

سابق چیئرمین ایف بی آر نے انکشاف کیا کہ اگر آج پاکستان کے شہریوں کی کیش ٹرانزیکشنز نکالی جائیں کہ کون لوگ کیش نکال رہے ہیں، وہ سب سے بڑے ڈان شوگر مل ہوگی یا چینی کا ڈیلر ہوگا، پاکستان کی پوری چینی کی تجارت کیش پر چلتی ہے، یا جو سارا سلسلہ ہے اس میں اگر غور کریں تو پتا چلتا ہے چینی کی ملز ایک سال نقصان شو کرتی ہیں اور دو تین سال میں سارے پیسے پورے کرلیتی ہیں، جس نے 85 روپے فی کلو کے حساب سے چینی بنائی ہوگی آج اگر وہ کم از کم 160 کی بھی بیچ رہا ہوگا تو اس کے کتنے پیسے بن گئے؟۔